Mısır ve İskenderiyye fethinde leyl ü nehâr şedâyid-i muhârebe ve nevâyib-i mudârabeye sîne-güşây-ı tehammül ü istıbâr olanlara hüsn-i mükâfât, muktezây-ı şîme-i mürû'et-i Şehriyâr-ı mekârim-simât olduğuna binâ'en, Sadrıaʿzam ve Serdâr-ı ekrem hazretlerine bol yenlü bir sevb aʿlâ sırt semmûr kürk ve elmâs-ı girân-kıymet ile müzeyyen bir kıtʿa çeleng ve murassaʿ bir kabza şemşîr ve vüzerây-ı ʿizâm ve Mîr-i mîrân-ı kirâm ve ağayân-ı Ocak ve ricâl-i Devlet-i ʿaliyye ve sâyirlerine serâsere dûhte üç sevb sırt semmûr kürk ve beş sevb bol yenlü semmûr pâçesi kürk ve on sevb kontoş semmûr pâçesi kürk ve sekiz kıtʿa murassaʿ altûn çeleng ve bir elmâslı on beş kıtʿa altûn çeleng tahsînî hâvî hatt-ı hümâyûna mashûben Mîrâhûr-ı Evvel-i hazret-i Şehriyârî Şemseddîn Beyefendi'ye teslîm ve irsâl olunduğundan başka, Kapudân-ı deryâ Vezîr Hüseyin Paşa hazretlerine bol yenlü bir sevb aʿlâ sırt semmûru kürk ve elmâs-ı girân-behâ ile tezyîn olunmuş bir kıtʿa çeleng-i pervîn-denk ve bir kıtʿa murassaʿ şemşîr ve süvâr oldukları kalyonda küşâd olunmak içün çeleng ve Zülfekār ve kal'a resm olunmuş musannaʿ bir sancak ve Vezîr Husrev Paşa hazretlerine serâsere dûhte bir sevb sırt semmûr kürk ve bir kıtʿa murassaʿ altûn çeleng [Ü4 93a] ve Kapudan Paşa [Ü3 167a] hazretlerinin ordularında mevcûd sergerdegân-ı asker ve kapudânân ve sâyireye ilbâs ve tevzîʿ içün on sevb-i semmûr pâçesi kontoş kürk ve yirmi kapûd ve birer elmâslı on kıtʿa çeleng ve elli kıtʿa yaldızlı sîm çeleng ve İngiltere donanması Amirali Ceneral Keys'e bol yenlü bir sevb sırt semmûr kürkü ve bir kıtʿa elmâslı çeleng ve elmâs ile müzeyyen şems derûnunda yine elmâslı yıldız ve hilâl resm olunmuş bir kıtʿa âvîze ve tuğrâlı altûn vazʿ olunmuş âl şerîd ve Riyâle Amirali Ricar Bergton'a Amiral Keys'e gönderilen eşyânın çelengden mâ-ʿadâsı tertîb ü tesrîb olunduğundan gayri, İngilterelü'nün Kara Askeri Sergerdesi Enşef Hacinson Ceneral'e dahi Amiral Keys'e gönderilen teşrîfât-ı behiyye ile iltifât olunup, ʿAcemî Burunu'nda muhârebe-i şedîdeye mübâşeret eden Ceneral Kot'a dahi bol yenlü bir sevb sırt semmûru kürk ve hafifce elmâs ile müzeyyen şems derûnunda yine elmâslı yıldız ve hilâl resm olunmuş bir kıtʿa âvîze ve tuğrâlı altûn vazʿ olunmuş bir âl şerîd ve İngiltere ordusunda mevcûd Macor Ceneral Kradok'a ve Macor Ceneral Mor'a ve Macor Ceneral Hob'a ve Macor Ceneral Mor'a ve Macor Ceneral Okes'e ve Ceneral Larson'a birer bol yenli sırt semmûr kürk ve birer altûn üzerine masnûʿ elmâslı yıldız ve hilâl nişânı ve yetmiş dokuzuncu recimendin kumandanı Kolonel Kamison'a ve sekizinci recimendin kumandanı Kolonel Drevson'a ve kırkıncı recimendin kumandanı Kolonel İspensır'a ve doksanıncı recimendin kumandanı Kolonel Hil'e ve ikinci recimendin kumandanı Kolonel Milor Valari'ye ve dokuzuncu [Ü3 167b] recimendin kumandanı Kolonel Yeksan'a ve Kolonel [Ü4 93b] Kemest'e ve Ceneral Enşef'in Sır Kâtibi'ne ve Kalor Ceneral Enşefin Sır Kâtibi'ne birer semmûr pâçesi kontoş kürk ile birer altûn nişân verilüp, Kolonel Lindannal'a dahi birer sevb-i semmûr pâçesi kontoş kürk ve altûn üzerine hafifçe elmâslı yıldız ve hilâl nişânı ve bir mücevher kutu ve Kolonel Mor'a dahi bunun ʿaynı verildiğinden gayri, şalopeler kumandanı İstivfeson'a ve Kapudan Halber'e ve Kapudan Mavel'e birer sevb-i semmûr pâçesi kontoş kürk ve birer altûn nişân ve sonradan gelmiş Ceneral var ise verilmek içün iki kıtʿa elmâslı yıldız ve hilâl nişânı li-ecli'l-ihtiyât gönderilüp, İngiltere donanması kapudanlarına ve mülâzımlarına ve kara askeri kolonel ve mayor ve kapudan mülâzımlarına ve sâyir ofiçyâllere her yedi yüzü on dörder dirhemden ve yedi yüz ellisi beşer dirhemden levha üzerine darb olunmuş tuğrâlı yıldız ve hilâl nişânı ve bunlardan mâ-ʿadâ sonradan tertîb olunan altı nefer Ceneral'e birer bol yenli semmûr kürk ve birer altûn üzerine elmâslı yıldız ve hilâl nişânı ve otuz nefer kalyonlar kapudanlarına birer semmûr pâçesi kontoş ve on dörder dirhemden altûn levha üzerine darb olunmuş birer tuğrâlı yıldız ve hilâl nişânı ve on beş foçyâllere birer semmûr pâçesi kürk ve on dirhemlik altûn levha üzerine darb olunmuş birer tuğrâlı yıldız ve hilâl nişânı Mîrâhûr-ı Sânî Esʿad Bey ile Kapudan Paşa hazretleri tarafına firistâde olunup, yerlü yerine teslîm olunması ifâde kılındı. Süveys donanması Amirali Balatkin'in [Ü3 168a] şimdiye dek ʿavdeti, İngiltere Elçisi'nin müteyakkını olmağla, mersûma müretteb elmâs ile müzeyyen şems derûnunda yine elmâslı yıldız ve hilâl nişânı ve tuğrâlı altûn [Ü4 94a] vazʿ olunmuş âl şerîd elçi-yi mezbûra teslîm ve îsâli tenbîh ü tefhîm olundu. Ve bu takımın Kara Askeri Sergerdesi Enşef Berd Ceneral'e bir sevb bol yenli sırt semmûr kürk ve elmâs ile müzeyyen şems derûnunda yine elmâslı yıldız ve hilâl nişânı ve tuğrâlı altûn vazʿ olunmuş âl şerîd ve yine bu takımın cenerallerine ve sâyir müteʿayyinlerine on ikisi on dörder dirhemlik ve seksan sekizi dokuzar dirhemlik ve ellisi yedişer dirhemlik ve yüz ellisi beşer dirhemlik altûn levha üzerine darb olunmuş tuğrâlı yıldız ve hilâl nişânı Ordu-yi hümâyûn'a tesyâr ve yerlü yerine teslîmi Sadr-ı ʿâlî-kadr hazretlerine ihtâr olundu.