Bir müddetden berü Rumeli'nde ihtilâf-ı kelime-i vüzerâ ve nifâk u şikāk-ı erbâb taʿyîn ile sûret-nümâ olan ihtilâlât-ı enhâ vü ercâ ve bu takrîb sû-be-sû ser-keşîde-i bağy u dalâl olan ehl-i şekā yevmen-fe-yevmen reʿâyâ ve ebnâʾ-i sebîli nehb ü yağmâ ve gümâştegân-ı Devlet-i ebed-müddet tarafından her mahalde mahsûr ve ne cânibde bulundular ise makhûr olmuşlar iken, yine ʿinâd u gavâyetlerinde müstemirr ve izrâr-ı ʿibâd-ı zaʿîfü'l-iyâda iʿtilâf [Ü3 160b] ile ʿukūbet-i dâreyni münkir olduklarından gayri, Mısr-ı Kāhire seferini rekîz-i zamîrleri olan mefsedete ʿillet ve dîn ü devlet husamâsı tarafından meşhûd olmayan hasârete cesâret etmişler idi. ʿAvn-i cenâb-ı Bârî ve meyâmin-baht-ı Tâc-dârî'yle Mısır gāyilesi külliyyen zâyil ve Devlet-i ʿaliyye'ye o maslahat-ı ʿazîmeden ferâğ hâsıl olup, Rumeli taraflarında ber-vech-i muharrer tehaddüs eden fesâdâtın defʿi semtine teşebbüs lâzım ve efrâd-ı [Ü4 85b] vüzerây-ı ʿizâmdan tedbîri müsellem ve şiddet-i batş u fetki maʿlûm-i ʿâlem olan bir Vezîr'in taʿyîni emr-i mühimm olup, hâlâ Rumeli Vâlîsi Vezîr Hakkı Mehmed Paşa bende ve bende-zâde-i devlet ve re'y-i sâyib ve keşf-i emr-i hâzır u gāyib ile kulûb-ı nâsa ilkāy-ı heybet eyleyüp, savletinden Rumeli halkı lerznâk ve zehre-i erbâb-ı fesâd çâk-çâk olduğu bi't-tecribe maʿlûm-i ehl-i idrâk olmağla, Rumeli'nin kâffe-i nizâmâtına bi'l-istiklâl meʾmûr ve bekā-yı nüfûzuna sebeb olmak içün beş sene Rumeli'nden ʿazl olunmamak zımnında hatt-ı hümâyûn şeref-sudûr olup, bu me'mûriyyeti îsâl zımnında Rikâb-ı müstetâb ağalarından birinin taʿyîni müşârun ileyhe mûris-i şeref ü iʿtibâr ve sebeb-i mübâhât u iftihâr olacağı tehakkukuyla hâlâ Kethudây-ı Bevvâbîn-i hazret-i Şehriyârî ʿİzzet Paşa-zâde Mehmed Saʿîd Bey, teşrîfât-ı seniyye ve hatt-ı Sultânî ile müveşşah evâmir-i ʿaliyye ile taʿyîn olunup, Rumeli'nde mütemekkin mechûl ve müteʿayyin efrâd-ı askeriyye ʿale'l-ʿumûm maʿiyyetine meʾmûr kılındığından başka, o makūleler hakkında şükr ü şikâyeti müsmir ve belki teʾdîb ü taltîfleri [Ü3 161a] bilâ-istîzân re'yine münhasır olduğu etrâfa işâʿat ve'l-hâsıl mekālîd-i umûr-ı Rumeli müsellem-i dest-i kifâyeti kılındı. Müşârun ileyh ile bu maslahat-ı ʿazîme mukaddemce istimzâc ve îrâd eylediği ârâ' u tedâbîrden fazl-ı Hakk ile meʿânî-yi nizâm-ı memleket istihrâc olunup, emr-i mezkûra mübâşareti sene-i âtiye behârına mevkūf olduğundan, ʿunvân-ı Serʿaskeri'yle tevkīr olunacağı mevsim-i mezkûra teʾhîr olunmuşidi. Cihet-i me'mûriyyeti serân-ı asker ve müteʿayyinân-ı sâyireye tarafından haber verilüp, Serʿaskerlik'in behara tevkīf olunduğunu [Ü3 86a] o makūle sebük-magzân-ı memlekete ifâde müteʿazzir ve şân-ı mezkûr beyne'l-ʿavâmm müşârun ileyhden dirîğ maʿnâlarını müzekkir olduğunu beyân ve şimdiden ʿunvân-ı Serʿaskerî hakkında erzânî buyurulmasını âverde-i zebân etmekle, Serʿaskerlik'ini hâvî müceddeden emr-i celîlü'ş-şân terkīm ve mukaddime-i meʾmûriyyeti tıbk-ı istidʿâsı üzere tanzîm olundu.