Vezîr Gürcü ʿOsman Paşa'nın [Ü4 84a] zulm ü iʿtisâf üzere hareketi ve kâffe-i me'mûriyyetinde gafleti, mukaddemâ rakam-zede-i kilk-i beyân ve bu sebeble Rumeli'nden ʿazl olunup, ʿunvân-ı muhâfaza ile Berkofça'da iskân ve Silistre Eyâleti tevcîhi hâline münâsib ü çespân görülmüşidi. Müşârun ileyh ʿakl-i sahîfine istinâd ve Pâsbân-oğlu'nun defʿ-i mazarratı zımnında baʿzı tedâbîr îrâd ve bu defʿa dahi lâf u güzâfına iʿtimâd olunup, me'mûriyyeti tecdîd ve metâlibine müsaʿade ile bâzû-yı kudreti tesdîd olunmuşidi. Mütemekkin olduğu mahalden ikişer üçer sâʿat mesâfeye vazʿ-ı vezâyiʿ ve tertîb-i talâyiʿ lâzım-ı cihet-i me'mûriyyeti iken, mekr-i düşmeni hâtırdan ihrâc ve Devlet-i ʿaliyye ve fukarâdan celb-i mâl tarîkına intihâc edüp, leylen dahi hâb-ı şîrîn ile tesmîn-i vücûd ve kemâl-i gurûr u pindâr ile istisgâr-ı düşmen-i mekr-âlûd edüp, hasm-ı mekkâr ise müşârun ileyhin hâlini tecessüs ve bu gafletini teferrüs ile leylen şeb-hûn edüp, müşârun ileyhi nevme-i gafletden bîdâr ve taraf taraf hücûma ibtidâr eyleyüp, mukāvemet mümteniʿ ve esbâb-ı müdâfaʿa mürtefiʿ olduğundan, bî-ceng ü sitîz kâr ü bârını terk ü gürîz ve Rahova'ya gelüp, şehriyye-i girân ve taʿyînât-ı firâvân ile etrâfda geşt ü güzâr eden eşhâsı daʿvet eylediği haberi karʿ-ı sâmiʿa-i devlet ve fîmâ-baʿd o havâlîde ikāmetinde fâyide vü menfaʿat olmadığından gayri, mîrîye küllî mazarrat îrâs eyleyeceği mütehakkak olmağla, mansıbına ʻazîmet irâdesi tarafına iş'âr u işâret olunmuşidi. Mahallinden kıyâm ve hareket-i dâiresine ictimâʻ u tezâhüm eden [Ü3 159b] segbânın terâküm eden şehriyyelerinin edâsına mevkūf olduğunu beyân ve zikr olunan müşâherenin edâsı hâric-i vüsʿ-i devlet ise dahi, başında olan haşerâtı irzâ ve hâllerine göre taksîm [Ü4 84b] ü iʻtâ içün üç-dört yüz kîse meblağ tarafına gönderilüp, külliyyen Rumeli'nden refʻi ve Anadolu semtine imrârı istisvâb u istihsân olunup, şehr-i Rebîʻulevvel'in yirmi beşinci günü Diyârbekir Eyâleti, müşârun ileyhe ve Marʻaş Eyâleti, selefi Vezîr Hüseyin Paşa'ya ve Niğbolu Kalʻası muhâfazası şartıyla Silistre Eyâleti, Ağa Hasan Paşa'ya tevcîh ve sûret-i me'mûriyyetleri başka başka emr-i ʻâlî ile taraflarına ifhâm u tenbîh olundu. Müşârun ileyhin bu tavr-ı garîbi hasm-ı nâ-bekâra mâye-i kuvvet ve etrâf u eknâfa başında olan evbâş u erâzili teslîte ʻillet olup, Belgrad yamağlarını ifsâd ve Muhâfız bulunan Vezîr Mustafa Paşa'nın askeri Fethülislâm'da bulunmağla, yamakların icrây-ı melʻanetlerine isti'dâd gelüp, cümûʿ-ı şer-endûd ile leylen kalʻaya suʻûd ve Alay-beyi ve Kapudanı ve müşârun ileyhin Dîvân Kâtibi'ni ʻâlem-i hestîden mefkūd etdikden sonra, müşârun ileyhi kebs ve ahz u habs edüp, katl olunanlar mebde'-i mazarrat olup, segbânlar dahi tahrîb-i memleket eylediklerini ve paşalarından râzî ve hoşnûd olduklarını hikâyetle, musannaʻ u müzevver mahzar temhîr ve âdemleriyle Âsitâne-i saʻâdet'e tesyîr eylediler. Eşkıyâ-yı merkūmenin cemʻiyyetleri üç-beş yüz âdemden ʻibâret ise dahi, kalʻa yedlerinde bulunup, icrây-ı te'dîbâtları tekellüfe muhtâc olduğundan başka, o tarafdan [Ü3 160a] dahi bir kapu açılacağı zâhir ve hüsn-i tedbîr ile bir çâresi görülmek vârid-i hâtır olup, bu bâbda erkân-ı devlet, idâre-i pergâr-ı fikret ve ârâ'-i sâ'ibeleri şu vechile karâr-gîr-i gāyet oldu ki, eşkıyâ-ı mezbûre mizâc-ı devleti yoklamak ve yâhûd sû'-i sânî'lerinden nedâmet el verüp, hakīkī dâmen-i ʻafva teşebbüs etmek vâdîlerinde [Ü4 85a] paşalarından eğerçi hoşnûd olduklarını ifhâm ve bu hâdisenin zuhûru segbân tâyifesinin tesallutundan neş'et edüp, fîmâ-baʻd itâʻat-i devletde müstemirr olacağların iʻlâm etmişler. Bu bâbda tehevvür ü taʻcîl iktizâ etmeyüp, nâmûs-ı devleti tekmîl zımnında te'dîbleri vakt-i fesîha te'cîl ve şimdilik mektûn-ı zamîrleri istikşâf u istîzâh ve Muhâfız Paşa ile miyâneleri islâh olunmak sûretinde müteʻayyinân-ı devletden ve Ocağ-ı ʿâmire tarafından birer âdem tesbîl olunmasına karâr verilüp, sâbıkā Atlu Mukâbelecisi Şâmî Râgıb Efendi ve Muhzır Ağa Vekîli Hasan Ağa iktizâ eden evâmir ve Ocak mektûbuyla irsâl ve sûret-i meʾmûriyyetleri lisânen dahi tafsîl ü icmâl kılındı.