Kādî Şüreyh'e müdânî [Ü4 83a] ve Muʿallim-i Evvel'e sânî Sadr-ı esbak Emîn Paşa merhûmun necl-i necîb ü ercümendi Mehmed Emîn Beyefendi Kādî-yi Şehr ve âsumân-ı hükûmete bedr olaldan berü, farz u takdîr olunan kıyem ü esʿâr [Ü3 158a] ve kilâb-ı selûkıyyeden eşedd olan sûkīlere taʿyîn-i hadd ü mikdâr eyleyerek, ʿibâdullahı igtirâr u garâmetden vikāye ve istimâʿ-ı daʿvâ ve fasl-ı miyâne-i husamâda ahad-ı tarafeyni ʿadem-i himâye ile icrây-ı ahkâm-ı Bârî ve bu mukābelede ferd-i âferîdeden taleb-i ʿivaz kasdında olmayup, zımn-ı vesîkada bi'l-ihtiyâr verilan şey'-i nâ-çîze izhâr-ı sûret-i kanâʿat-kârî eylediği, mir'ât-ı temâsîl-i hakāyık-ı eşyâ ve âyîne-i suver-i ahkâm-ı millet-i beyzâ olan tabʿ-ı gîtî-nümây-ı Cihân-dârî'de rû-nümâ olmuşidi. Bu makūle ʿafîf ü perhîz-kâr ve tehvîn-i meʿâş-ı nâsa sarf-ı iktidâr eden zevât-ı ber-güzîde-sıfâta hüsn-i sânî ve pâye-i refîʿ ile pâdâş u cezâ mûcib-i şevk-ı emsâl ü ekfâ olacağı bedîhiyyatdan eclâ olduğuna binâ'en, hakkında şâmilü'l-etrâf olan eltâf-ı Şâhâne levha-tırâz-ı zuhûr ve taraf-ı Fetvâ-penâhî'den altı ay medd içün tahrîr olunan telhîsin bâlâsına Anadolu Sadâreti Pâyesi hatt-ı hümâyûnu şeref-sudûr olup, işbu Rebîʿulevvel'in yirmi dördüncü Salı günü o ʿalem-i ʿilm ü edeb ve o mahdûm-ı ʿâlî-haseb mülhak bi's-sudûr oldu.