Devlet-i ʿaliyye müttefiklerinin İspanyalu'dan ʿadem-i emniyyetleri hasebiyle maslahat-güzârlarının Âsitâne'de ikāmeti tecvîz olunmayup, bâlâda tahrîr olunduğu vech üzere maslahat-güzârları memleketlerine iʿâde ve bu kazıyye müttefiklerin celb-i emniyyetine mebnî olup, Devlet-i ʿaliyye'nin garaz-ı âharı olmadığı Reʾîsülküttâb-ı vakt tarafından Başvekîl'lerine ifade olunmuşidi. Tâ'ife-i mezkûreden Devlet-i ʿaliyye bir zarar müşâhede etmeyüp, [Ü4 83b] vehm-i mücerred-i âhar ile elçilerini redd, ʿukde-i derûn-ı erbâb-ı [Ü3 158b] kabûl u sadd olduğundan, refte refte müttefikler ırzâ ve ilzâm ve elçilerinin kabûl olunacağı bi'l-vâsıta ifhâm olunmuşidi. Bu defʿa Âsitâne-i saʿâdet'e irsâl eyledikleri elçileri tevârüdüyle şehr-i Rebîʿulâhır'ın sekizinci Salı günü tertîb olunan Dîvân-ı bülend-erkân'a getürdilüp, ʿatebe-i Şâhâne'ye vazʿ-ı cebîn-i ibtihâl ve nâmesini teslîm ve hıdmetini ikmâl edüp, muʿtâd olan hilʿati iksâ ve meʾvây-ı kadîmine îvâ olundu.