Bundan akdem Kethudâlık mesnedine mütesâʿid ve tashîh-i mizâc içün Âsitâne-i saʿâdet'e râciʿ ü ʿâ'id olan ʿOsmân Efendi'nin Serdâr-ı ekrem hazretleriyle ihtilâtı ve Kapudân-ı deryâ Vezîr Hüseyin Paşa hazretlerine teʿalluk u irtibâtı olduğundan fazla, Mısr-ı mahrûse'nin kâffe-i ahvâline [Ü4 82b] vukūf u ʿusûru zâhir ve bu hılâlde Mısır tarafında bulunmasının eşedd-i lüzûmu vârid-i hâtır olmağla, şehr-i Rebîʿulevvel'in yirmi ikinci yevm-i Ahad huzûr-ı Kāyim-makāmî'ye daʿvet ve Sadrıaʿzam Kethudâlığı içün menkib-i liyâkatine ilbâs-ı hilʿat kılınup, huzûr-ı mevâhib-mahsûr-ı Şâhâne'de kûze-i [Ü3 157b] hâfızasına baʿzı vesâyây-ı hafiyye îdâʿ ve müşârun ileyhimâ hazerâtına iblâğ u ismâʿ eylemesi tenbîh ü tavsiye ve metn-i meʾmûriyyeti vechile tahşiye kılındı. Mahrûse-i Mısır, hamiyyetün ʿani'l-ısr, bâ-fazl ü ʿinâyet-i cenâb-ı Bârî, zamîme-i memâlik-i hazret-i Tâc-dârî kılınup, ezhân-ı erbâb-ı itkānda tasavvur olunan efâʿîlin icrâsına ve müceddeden verilecek nizâmât-ı Mısrıyye'nin te'kîd ü ibkāsına kudret ü liyâkati bedîdâr-ı maʿlûmü'l-mişvâr ve umûr-ı Defterî'de mücerrebü'l-âsâr bir zât-ı müteşahhısın Defterdar nasb olunması mûcibât-ı vakt ü hâlden olup, binâʾen-ʿalâ-zâlik sâbıkā Tersâne-i ʿâmire Emîni Şerîf Mehmed Efendi bi'l-fiʿl Defterdârlık ve Sadrıaʿzam Kethudâlığı gibi hidemât-ı cesîmede müstahdem ve sadâkat ü istikāmeti gayr-i mübhem olduğundan gayri, vakʿ u iʿtibârı nümâyân ve hüsn-i hulk ve imtizâcı “Mâlâ-yahtâcü ilâ bürhân” kabîlinden olmağla, efâʿîl-i cedîdenin fazl-ı Hakk ile icrâsına muvaffak olacağı melhûz u meʾmûl ve nizâmât-ı Mısrıyye'ye dâ'ir mebde'-i hıdemât-ı nâfiʿa olacağı muntazır-ı erbâb-ı ʿukūl olmağla, şehr-i mezkûrun [yirmi] dördüncü Salı günü Mısır Defterdarlığı'yla pâ-nihâde-i merkez-i ikbâl ve yedine verilan taʿlîm-nâme mûcebince hareket eylemesi gûş-i hûşuna îsâl ve birkaç gün murûrunda Kethudâ Bey'le mûmâ ileyh başka başka sefîneler ile Mısır cânibine bâd-bân-güşây-ı istiʿcâl oldular.