Bozkır Şeyhı'nin dâmâdı Hayreddîn, umûr-ı Maʿden'e itâle-i dest ve seng-i cevr ü zulmüyle mînâ-serây-ı kulûb-ı fukarâyı şikest eylediği şuyûʿuyla Bozkır Maʿdeni Emîni Ağa -ki ibtidâsı eşiddâ'-ı kudâtdan olup, baʿdehû terk-i tarîk ve Kapucu-başılık ile esbâb-ı ihtişâmını terzîk etmişidi- mezbûru iʿdâm ile Maʿden nizâmını iltizâm edüp, maktûlün birâderi vesveseye zâhib ve der-ʿakab hârib olup, kasd-ı intikām ile Aladağ Aʿyânı Mustafa ve sâyirlere ilticâ ve cemʿ-i erâzil ü eşkıyâ [Ü4 82a] etdikden sonra, Maʿden Emîni'ni ve seksan kadar etbâʿını katl ü istîsâl ve zuʿmunca birâderi sârını istihsâl edüp, Karaman Vâlîsi ʿAlâ'eddîn Paşa'nın bu kazıyyenin hudûs edeceğine fî-bâdiyyi'l-emr ıttılâʿı ve Maʿden Emîni tarafından ʿadem-i intifâʿı sebebi ile teşeffî-yi gayz içün visâde-i ihmâle izticâʿı mahsûs olduğuna binâ'en, nizâm-ı kazâ re'yine havâle olunduğu takdîrde fütûr ü rehâvet ibdâ edeceği muhakkak ve Karaman'dan ʿazli zât-ı [Ü3 157a] maslahata evfak olup, vech-i muharrer üzere yine Hanya Sancağı tarafına tevcîh ve eyâlet-i mezkûreden tebʿîd vü tenzîh olunmuşidi. Eyâlet-i mezkûre hâlî ve o tarafda vücûd-i vüzerâ maʿdûm olduğu hasebiyle, mahrec-i Vezâret olan menâsıb-ı Devlet-i ʿaliyye'de bulunanların biri müceddeden çırâğ ve Eyâlet-i mezbûreye Vâlî olması muvâfık-ı reʾy-i ʿâlî olmağla, hâlâ Mîrâhûr-ı Evvel-i hazret-i Şehriyârî Zühdî İsmâʿîl Bey cenâblarının Rütbe-i sâmiye-i Vezâret'e istihkākı mütebeyyin ve icrây-ı irâdât-ı Devlet-i ʿaliyye'ye kudreti müteʿayyin olduğundan başka, fi'l-asl gars-ı yemîn-i hazret-i Cihân-dârî ve çırâğ-ı hâssu'l-hâss-ı cenâb-ı Tâc-dârî olup, yevm-i mezkûrda Rütbe-i Vezâret ve Karaman Eyâleti ile mübeccel ve bu sebeble münhall olan Mîrâhûrluk, Kapucular Kethudâsı olan Mîr Şemseddîn'e tevcîh olunup, Kapucular Kethudâlığı'yla ʿİzzet Paşa-zâde Mehmed Saʿîd Bey çâşnî-yâb-ı kand-ı mükerrer-i emel oldu.