Bir sene mukaddem Kethudây-ı hazret-i Sadr-ı ʿâlî ʿOsmân Efendi, iki bin kadar âdem ile Mısır'a dâhil olup, Mısır Kalʿası ve hârici cümleten Fransızlar yedinde iken, otuz altı gün mesfûrları Mısır'a ayak bastırmamış idi. Françelü'nün yedi-sekiz bin müretteb askerleri ve müceddeden ceng taʿlîm etdikleri yedi bin kadar Kıbt ve sâyir hevâdârları müstaʿidd-i ceng iken ve bâ-husûs şehre müşrif kalʿa ve Cize misillü metîn bir palanga ve medâr-ı tesliyetleri olan sugr-i İskenderiyye yedlerinde iken, eyyâm-ı muhâsara bilâ-imtidâd Mısır ve muzâfâtını terk ü istirdâd ile tahliyeye rızâ-dâde olmaları, mahzâ lutf-i ʿinâyet-i Subhânî ve yümn-i baht-ı hazret-i Cihân-bânî'den münbaʿis bir keyfiyyet olduğu zâhirdir. Bu haber-i meserret-eseri Kapudan Paşa hazretleri Silâhdârları Mehmed Ağa ile hâk-i ʿatebe-i Mülûkâne'ye ʿarz edüp, resânende-i haber-i mezkûr, nâyil-i şeref-i ʿizz-i huzûr olup, o taraf ahvâlini ahsen-i taʿbîr ile takrîr ve bu sebeble mazhar-ı eltâf-ı Şehriyâr-ı kişver-gîr olup, on beş bin guruş [Ü3 153a] ʿatiyye-i behiyye ile mükerrem ve beş kîselik bir sehm ile dil-şâd u hurrem oldu. Leyl ü nehâr endûh [Ü4 78b] u ekdâr-ı Mısrıyye ile dil-hırâş-ı ıstıbâr olan kâffe-i ehl-i İslâm mesrûr u şâd-kâm olup, girih-i nâçîz-i maslahat olan İskenderiyye'nin dahi fî-akrebi'l-eyyâm silmen ev harben zamîme-i mülk-i Pâdişâh-ı Dâr[â]-gulâm olmak temenniyâtıyla secde-ber-endâz-ı mihrâb-ı duʿâ ve dest-i berdâşte-i Dergâh-ı kibriyâ olmuşlardır. Mısır'da bulunan Françe askeri Sergerdesi Belbar Ceneral vech-i muharrer üzere kazıyye-i tahliyeyi İskenderiyye'de mahsûr Mino Ceneral'e inhâ ve tahliyeye hass ü igrâ edüp, mûsıl-ı haber yedinden bu mâddeye dâ'ir olan kağıdı ahz ve kendüsini bilâ-cevâb redd etmekle, ceneral-i mesfûrun bu ru'ûnet ü huşûneti inşâ'allah kendüye mûcib-i nedâmet ve sebeb-i zevâl ü heleket olacağı bî-iştibâhdır.