Kapudan Paşa hazretleri, Riyâle Bey ile birkaç kıtʿa sefâyin Dimyât'a tesyîr ve Ordu-yi hümâyûn tarafından dahi bir mikdâr asker taʿyîn olunmasını Sadrıaʿzam hazretlerine tahrîr etmişler idi. Tıbk-ı tahrîrleri üzere iki bin Arnabûd, Dimyât'a irsâl edüp, müteʿâkıben Haleb Vâlîsi Vezîr İbrâhîm Paşa'yı dahi üç bin kadar asker ile taʿyîn buyurmuşlar idi. Vezîr-i müşârun ileyh Dimyât'a duhûl ile sugr-i Dimyat'da olan burûcu zabt etdiği hâlde Fransızlar Îzbe Kalası'na tehassun ve teslîminde izhâr-ı teʿannüd ü temerrün eylediklerinden, emr-i muhasara teʿayyün edüp, tarafeyn harb ü kıtâl ile iştigāl ve nihâyetü'l-emr küffâr bir gice Mısır'a doğru firâr eylediklerinden, zikr olunan Îzbe Kalası ve şark ve garb tarafında olan burclar zabt olunup, Dimyât'ın dâhil ü hârici çirk-i ehl-i şirkden tasfiye ve muhafazası lâzım gelan mahallerine müstahfızlar taʿbiye olundu.