Esfâr-ı bahriyye takrîbi ile sefâyine mahsûs askerin kesreti olup, sınıf-ı âhardan temyîzi müteʿazzir ve baʿzı sefele-i nâs, icrây-ı mefâsid ü iblâs zımnında hey'etini tebdîl ve kıyâfetini, Kalyoncu kıyâfetine tahvîl edüp, ehl-i ʿırz makūlelerini mütezarrır ve tahkīk olunduğu vechile baʿzı ehl-i zimmet leylen şal sarup ve müsellah gezüp âdem soymak ve nehâran esnâf dükkânlarından cüz'î şey verüp, [Ü3 138b] küllî şey almak ve baʿzan bilâ-ʿivaz cebren metâʿ kaldırmak misillü gûnâ-gûn melʿanete tecâsürleri resîde-i hadd-i tevâtür olup, bu fesâdın izâlesiyle ʿibâdullahı tervîh lâzım geldiğine binâ'en, fîmâ-baʿd sınıf-ı âhar şal ve ahmediyye ve Kalyoncu tâyifesine mahsûs elbiseyi geymeyüp, bu yasağı baʿde'l-iblâğ kulağa almayan bî-dimâğlar, zâbitleri maʿrifetiyle te'dîb ve ısrâr üzere olanları birer mahalle tagrîb ve belki eşedd-i nekâl ile taʿzîb kılınmak beyânıyla [Ü4 65a] taraf taraf neşr-i evâmir ve iʿlân-ı nevâhî vü zevâcir kılınup, bu mülâbese ile zikr olunan ehl-i mefsedet ü enhâs, hey'et-i kadîmelerine rucûʿ ile tavʿan defʿ-i yek-rengî vü iltibâs eylediler.