Bir müddetden berü Rumeli mansıbına müstevlî olan Gürcü ‘Osmân Paşa'ya müte‘addid evâmir-i celîle gönderilüp, Berkofça'dan Pâsbân-oğlu'nun âdemlerini tard u ib‘âd ve zu‘afây-ı kasabayı pençe-i şikencelerinden âzâd etmek irâde olunmuşidi. Lâzım geldiği vech üzere icrây-ı irâde-i devlete muvaffak olamayup, giderek nüfûzuna halel ve ma‘iyyetinde olan askere fütûr u kesel ‘ârız olup, ‘azli zamâyir-i vükelây-ı devletde istitâr ve birkaç def'a huzûr-ı mevâhib-mahsûr-ı hazret-i Şehriyârî'de bu mebâhis tekrâr ve leʿalle ve 'asâ ile fevt-i maslahat revâ görülmeyüp, Rumeli, Hakkı Paşa'ya ve Selânik, ʿOsmân Paşa'ya tevcîh olunmak sûreti karâr-gîr-i müsteşîr ü müsteşâr olmuşidi. Hakkı Paşa'nın Bosna'dan rucûʿu zemâna muhtâc olup, berü taraflara tekarrübünden evvel keşf-i hâl eylemesi, ʿOsmân Paşa'nın maslahatdan keff-i yed eylemesine sebeb-i ʿâdî ve eşkıyânın bir kat dahi fürce-yâb-ı hasâret olacağlarına bâdî olur ihtimâlâtı sırran Hakkı Paşa'ya ifâde ve bu mazmûnda tahrîrât-ı mufassala tarafına firistâde olunmuşidi. Müşârun ileyhin Köstendil'e vusûlü haberi vâsıl-ı sâmia-i evliyây-ı devlet [Ü4 63a] ve ber-minvâl-i muharrer mansıblarının tahvîl ü tebdîli emri işâʿat olunduğu hılâlde, ʿOsmân Paşa rağbeten ev rehbeten Berkofça'yı eyâdî-yi muhâlifînden istirdâd eylediğini [Ü3 137a] birâderiyle Âsitâne'ye tahrîr ve ber-muktezây-ı vakt ü zemân Delîl-başısı'na Mîr-i mîrânlık ve birâderine Kapucu-başılık ihsân kılındığından gayri, hıdmetde bulunmuş vüzerây-ı ʿizâma irsâl buyurulan teşrîfât-ı seniyyeden hisse-yâb ve tahsîni müştemil tahrîrât ile hâtırı isticlâb olunmuşidi. Müşârun ileyh ʿazl ihtimâlini vermeyüp, mutmaʾinnü'l-bâl dâd ü sited ile iştigāl üzere iken, Selânik tevcîhi haberi tarafına vürûd ve rûd-ı emniyyesini has-endûd edüp, semt-i havf u haşyete dahi zâhib ve: “Şu kadar mâl itlâfıyla Berkofça'yı istihlâs eyledim. Bir müddet dahi Rumeli mansıbında istikrârım vâcibdir" deyü Der-i devlet-medâr'a mekâtîb irsâl ve Hakkı Paşa tarafına dahi: “Keyfiyyet, mahalline ʿarz olunmuşdur. Bu taraflara gelmeyesiz” deyü haberler îsâl ve bîrûn ez-kıyâs bîm ü hirâsından Sofya vücûhunu giriftâr-ı kayd-ı ihtibâs eylediğini Hakkı Paşa istimâʿ ve bu tavr-ı garîbden meʿânî-yi ʿisyân tecrîd ü intizâʿ edüp, askerinin kesretini yâd ve ʿOsmân Paşa'nın zulmünü taʿdâd ve hakkından gelmek isticâzesiyle feryâd etmişidi. ʿOsmân Paşa'nın bu reftâr-ı nâ-hencârı her ne kadar hazm olunmayacak derecelerde ise dahi, hakkında bir nevʿ gûşmâl irâde olunsa, başında olan haşerât ifsâd-ı ʿâlem ve belki dağlu eşkıyâsıyla müttehid ü hem-dem ve kendüsi dahi bir mahalle ʿinân-tâb ve yâhûd bir mahalle tehassun ile Devlet-i ʿaliyye'yi itâb eyleyeceği havâlî-kerd-i havâtır-ı uli'l-elbâb olduğuna binâʾen, tarafına nush-âmîz mektûblar ve vaʿd ü vaʿîdi müştemil haberler [Ü4 63b] itâre olunup, ahadühümâ âhara ʿazv-i kusûr ile gayzları sükûn bulmayup, bilâhare miyânelerini ıslâh içün ikisinin dahi Kapu Kethudâsı olan Süfyân Ağa, Der-i devlet'den taʿyîn ve Selânik ehâlîsi müşârun ileyhden [Ü4 137b] mütevahhiş olup: “Selânik'e gelürse, yâ perîşân ve yâhûd defʿ-i sâyil sûretinde muhârebe ve fedây-ı cân ederiz” deyü serîre-i hâllerin tebyîn eylediklerine binâ'en, bu mahzûrun defʿi ve matlûbu üzere maslahatdan eli çıkmaması kasdıyla Silistre Eyâleti menşûru, Ağa-yı mûmâ ileyhe sırran iʿtâ ve Mûsâ Paşa meʾmûriyyeti dahi ʿuhdesine tefvîz olunacağı îmâ olunup, bu sûretle rızâ kābil oldukda, Selânik Sancağı, Mûsâ Paşa'ya tevcîh olunacağı tasmîm ve Mûsâ Paşa'ya göndermek üzere bu meʾâli şâmil tahrîrât dahi mûmâ ileyhe teslîm olunup, Vezîr Hakkı Paşa'nın dahi ʿan-asl meʾmûriyyeti dağlu eşkıyâsına olup, Edirne'de ikāmet ve her tarafa asker tesyîriyle icrây-ı meʾmûriyyet etmek bâbında bu defʿa dahi hatt-ı hümâyûn ile müveşşah emr-i ʿâlî ve istiklâlini mûcib başkaca bir kıtʿa hatt-ı hümâyûn tarafına irsâl ve hilâl-i râhda ber-mûceb-i tavr-ı sâlif telyîn-i ʿarîke-i her muhâlif eyleyerek, Edirne'ye doğru ʿinân-rîz-i ʿizz ü ikbâl olduğu ve Süfyân Ağa'nın vusûlünden mukaddem ʿOsmân Paşa'nın dahi ʿarîzası gelüp, irâde-i sâbık üzere Berkofça muhâfazasına varup, Selânik'i dahi Mütesellim ile zabt eyleyeceğini tahrîr ve mukaddemâ tertîb olunan tedbîr lağv olup, matlûb dahi hâsıl olmuş bulunmağla, ol vechile hareket eylemesi bâbında tarafına tahrîrât tesyîr olunup, ferkaʿa-i esâbiʿ makūlesinden olan münâzaʿaları mündefiʿ ve âfâk-gîr olan ürcûfeleri zâyil ü mürtefiʿ oldu. [Ü4 64a]