Birkaç mâh mukaddem Edirne Bostancı-başısı nasb olunan Akbaş Hüseyin Ağa ʿuhdesine muhavvel olan husûslarda saʿy ü ihtimâm etdiyse dahi, ber-vefk-ı dil-hâh-ı devlet bir maslahat-ı nâfiʿaya zafer bulmayup, bekāsında fâyide olmadığı dahi müşâhede olunduğundan, ʿazli karâr-dâde olmuşidi. Birkaç sene mukaddem Edirne Bostancı-başısı olan Serbest-zâde Kapucu-başı Mehmed Ağa'nın cemʿ-i asker husûsunda kudreti ve o havâlî keyfiyyetine vukūf u maʿrifeti olduğundan, işbu Zilhiccetü'ş-şerîfenin altıncı günü mükerreren Edirne Bostancı-başısı nasb ü taʿyîn ve selefinin âhâd-ı nâs gibi hayyiz ü rütbeden huluvvü revâ görülmeyüp, Kapucu-başılık ile ʿunvân-ı berât-ı ʿubûdiyyeti tezyîn olundu.