Zîr-i sâye-i Devlet-i ʿaliyye'de âsûde olan müste'men tâyifesine seyr-i cevâmiʿ ü mesâcid içün ez-kadîm ruhsat ʿinâyet olunduğuna binâ'en, Moskov Elçisi dahi seyr ü temâşâya taleb-kâr ve niyâzına müsâʿade sûreti bedîdâr olup, ol bâbda emr-i ʿâlî dahi ısdâr olunmuşidi. Mesfûr nere ve mâddesini ve İsvec Elçisi'ni alup, Süleymâniyye Câmiʿi'ne dâhil ve kemâl-i veleh ü hayret ile mütâlaʿa-i sanâyiʿ ü bedâyiʿ-i câmiʿ-i şerîfe müştagıl olduğu hâlde, ʿâdet-i bâtılaları üzere kālîçelere ilkāy-ı büzâk ve tahkīk-ı tûl u ʿarz zımnında mesâha-i hazîz u tâk eylediklerini baʿzı talebe müşâhede edüp, bu sû'-i sanîʿ-i ihânet ü tahfîfe mahmûl olduğunda ittifâk ve fi'l-hâl talebeye izvirâr-ı ahdâk ʿârız olup, elfâz-ı dürüşt ve müşt ü hişt ile Moskovlu'yu câmiʿden tard ve gitdikce münâzaʿaları müştedd olduğu [Ü4 60a] haberini zâbitân istirâk edüp, mahall-i maʿrekeye seyr-i serî ile resîde ve Moskovlu'yu talebenin keşmekeşinden güc ile tahlîs ü âremîde [Ü3 134a] etmişler idi. Devlet-i ʿaliyye'nin vâkiʿ olan meşâgılı hasebiyle cümle ile müdârâ lâzime-i maslahatından iken, Moskov Elçisi'nin gûfte-i mikraʿa-i tevbîh olması, muhâlif-i rızây-ı Devlet-i ebed-müddet olup, bâ-husûs tâyife-i mesfûre ruʿûnet ü huşûnet ile me'nûs ve bu bâbda inkıbâz u infiʿâlleri dahi mahsûs olup, bu kazıyyeyi hükm-i kazâ vü kadere isnâd ile cihet-i te'lîf ü tatyîblerine mübâderet münâsib görüldüğüne binâ'en, o makūle hâlden anlamaz ve resm-i devleti bilmez talebenin ekserîsi ele getürilüp, baʿzısı darb-ı vecîʿ ile te'dîb ü takrîʿ ve bir-iki neferine câm-ı himâm tecrî ve baʿzısı nefy ü tagrîb olunarak suver-i gûşmâlleri tenvîʿ olundu.