Mâbeynci Ahmed Beyefendi Ahûr-kapu'da vakiʿ ihrâkdan sonra, Hazîne Kethudâsı Ağa'nın li-ecli'l-beyʿ terk eylediği hânesinde ber-vech-i ʿâriyet ikāmet etmişidi. İşbu Zilkaʿde'nin on beşinci İsneyn gicesi sâʿat beşde iken hâne-i mezkûreden dahi âteş zuhûr edüp, ittisâlinde vâkiʿ Muharrir-i ʿâcizin hânesi ve yemîn ve kubâlesinde vâkiʿ büyût muhterik olup, otuz seneden berü sâye-i Devlet-i ʿaliyye'de cemʿ eylediğim tarâyif-i eşyâ ve kütüb-i bî-behânın baʿzısı tuʿme-i şuʿle-i zevâl ü fenâ ve baʿzısı dest-bürd-i nehb ü yağmâ ve kem kıymet ve naklinde ʿusret olan baʿzı eşyây-ı hasîseye zafer hâsıl olup, yağmâ-gerân ile hâl-i pür-melâlim Hakîm Şifâyî'nin ahaveyn beyninde taksîm eylediği mîrâs kazıyyesine mümâsil oldu. Cihân-dâr-ı şefekat-perver ıztırâb-ı hâlime ʿayn-i kerâmet ile nazar ve beş bin guruş ʿatıyye ile ser-i iftihârımı tâk-ı nüh-revâk-ı feleke berâber buyurdular.