Memleket-i mezbûreden izâhe-i gürûh-ı eşkıyâya teşmîr-i dâmen ve mahall-be-mahall sell-i seyf-i celâdetle tedmîr-i düşmen eden serân-ı askere iltifât u rağbet, tezâyüd-i şevk u himmetlerine vesîle olacağı vâreste-i külfet ü işâret olunduğundan gayri, birkaç mâhdan berü terk-i râhat u hâb ve hasm-ı hîle-kârın nîreng-i fesâdını sû-be-sû ibtâle sürʿat ü şitâb eden sadâkat-kârân-ı devlete bezl-i sunûf-ı niʿam ve feth-i derîce-i kerem, şîme-i tâc-dârân-ı eslâf ve ʿâdet-i zimâm-gîrân-ı hükûmet-i etrâf olduğu, ʿaks-endâz-ı mir'ât-ı tabʿ-ı Pâdişâh-ı İskender-evsâf olduğuna binâʾen, memleket-i Eflâk'da kirâren ve mirâren yararlıkları müşâhede olunan cân-sipârân-ı devletden ʿAliyyüddîn Paşa'ya beş bin guruş ve bir sevb kontoş semmûr kürk ve Dergâh-ı ʿâlî kapucu-başılarından olup, külliyyetlü asker ile her maʿrekede isbât-ı vücûd ve fedây-ı bûd ve ne-bûd eden İbrâʾîl Nâzırı İbrâhîm Ağa'ya on bin guruş ve bir sevb kontoş semmûr kürk ve şecâʿat ü behâdırlığı elsine-i nâsda mezkûr ve vukūʿ bulan meʿârikde sabr u sebâtı meşhûr Delîl-başı Karslı ʿAli Ağa'ya Îrâd-ı Cedîd tarafından zabt olunan zeʿâmetlerden senevî beş kîse nemâlı gedüği ile bir zeʿâmet ihsân olunup, Eflâk Beyi'nin dahi bâlâda zikr olunduğu vechile bu bâbda zuhûr eden gayreti ve i'mâl-i asker ve zahîre [Ü4 57b] ve cihet-i uhrâ ile sebkat eden hidmeti nezd-i ferd-i Mülûkâne'de pesendîde olup, nevâziş-i Şehriyâr-ı âfâk'a kesb-i istiʿdâd u istihkāk etmekle, bâlâsı hatt-ı hümâyûn ile müveşşah bir kıtʿa tahsîl-i hidmet emr-i celîlü'ş-şânı ve bir kabza mücevher hançer ve bol yenlü [Ü3 131b] aʿlâ bir sevb-i semmûr tarafına irsâl ve benî nevʿinden şahs-ı vâhide gayr-i müyesser olan nevâziş-i Şâhâne ile makzıyyü'l-âmâl kılındı.