Kasaba-i mezkûrede bir müddetden berü ikāmet ve etrâf u eknâfını pâ-zede-i hasâret eden eşkıyânın tedmîri ve kasaba-i mezkûrenin zabt u teshîri, matlûb-ı hazret-i Cihân-dârî olduğu Silistre Vâlîsi Vezîr Mûsâ Paşa'ya müteʿaddid fermân-ı celîlü'ş-şân ile ifâde vü beyân olunmuşidi. Eşkıyânın mahall-be-mahall savlet-i asâkir-i devletden hezîmeti müşârun ileyhin dahi bâʿis-i feverân-ı tenevvür-i hamiyyeti olup, der-ʿakab asâkir-i vâfire techîz ü tertîb ve Silahdârı'nı Başbûğ nasb ve Plevne'ye tesrîb etmişidi. İşbu Şevvâlü'l-mükerremin yirmi dördüncü günü asker-i mansûr Plevne'yi mahsûr [Ü4 55b] edüp, zümre-i bugāt birkaç sâʿat izhâr-ı sebât ve gayret-i câhiliyye iktizâsıyla ihtiyâr-ı memât edüp, encâm-ı kâr kasabada ʿadem-i istikrâr ile melâz ittihâz eyledikleri Vidin tarafına firâr ve verâlarından taʿyîn-i asker-i cerrâr kılınup, bir mikdârı küşte ve bir mikdârı dest-i beste ve ecel-i nâ-resîdeleri tîğ-i siyâsetden reste olup, bu vechile kasaba-i mezkûre dahi tahlîs ve muhafazasına beş-altı yüz kadar asker tahsîs olunup, bundan [Ü3 129b] sonra Lom ve Rahova istihlâsına asker tesyîr eyleyeceni Vezîr-i müşârun ileyh tahrîr edüp, “Cevletü'l-bâtıli sâʿa” mefhûmuna mâ-sadak olan erbâb-ı şûr u nizâʿa fazl-ı Îzed-i ecell ile mahall-be-mahall izâka-i zehrâbe-i ecel ve irâka-i dem-i fâsid-i sû'-i ʿamel hâletleri gelüp görülüp, inşâ'allâhü Teʿâlâ bundan böyle pîrâmen-i gülistân-i mülk-i Hâkānî'de giyâh-ı hod-reste gibi nâbit olan ehl-i zeyg u dalâl direvîde-i mincel-i satvet-i Şehriyâr-ı bedîʿü'l-fiʿâl olup, reʿâyâ ve zîr-i destân, âsûde-nîşîn-i sâye-bân-ı rahat u itmi’nân ve ebnây-ı sebîl ve sûdâ-gerân, emniyyet-i turuk ile sâlimen ve gānimen âyende vü revende olacağları cezm-kerde-i erbâb-ı ferâset ü îkāndır.