Pâsbân-oğlu'nun rekîz-i zamîr-i habâset-tahmîri olan etvâr-ı nâ-hemvâr yevmen-fe-yevmen teceddüd ve taht-ı livây-ı ʿisyânında tehaşşüd eden eclâf-ı nâs ile etrâf u eknâfa itâle-i yed-i teʾannüd ü temerrüd eylediği, evvel ve âhır maʿlûm-i ekâbir ü esâgır olup, bir müddetden berü Vidin câniblerinde zehâyirin kılleti olmağla, Eflâk tarafından celb-i zehâyir ve Devlet-i ʿaliyye'ye dahi bir nevʿ hadşe îrâs etmek kasd-ı bedîle mukaddemâ o taraflara vâfir eşkıyâ geçirüp, Fethülislâm ve Kırayova ve sâyir o havâlîde bulunan kurâ ve zıyâʿı zabta mütecâsir olmuşidi. Şakī-yi merkūmun defʿ-i tesallut u mezâlimi ve enf-i ruʿûnet ü hıyânetinin irgāmı vâcibât-ı mülkiyyeden olmağla, derhâl Selânik Mutasarrıfı Vezîr Ağa Hasan Paşa, Deliorman halkı ile ve İbrâʾîl Nâzırı, Kazak ve sâyir maʿiyyetine meʾmûrlar ile ve Silistre Vâlîsi Vezîr Mûsâ Paşa'nın Delîl-başısı, kapusu halkıyla Eflâk'a taʿyîn olunup, Eflâk Voyvodası dahi tedârük ü cemʿ etdiği asker ile mübâşir-i harb olup, zahîre ve cihet-i uhrâ ile askerî tâyifesine sıklet çekdirmemek üzere meʾmûr ve Kırayova'da vâkiʿ olan ceng ü nizâl -ki inbilâc-ı subh-ı sâdık [Ü4 54b] zafere dâll idi- bâlâda ber-vech-i icmâl sahîfe-zîb-i sutûr olmuşidi. Eşkıyây-ı mezkûrenin mukaddemâ Kırayova'ya istîlâlarından garaz-ı fâsidleri Kırayova tarîkını sedd ile Dimnik ve sâyir mahallere hücûm olduğunu Eflâk Voyvodası cezm edüp, dâyire-i askerîye merkez ihtiyâr etdiği İslante Kasabası'ndan Tergoz'a başka asker tesyîr ve Tergoz'u zabt u teshîr ʿakabinde Ada-kalʿası Kāyim-makāmı ile muhâbere ve Çernes'e tekarrüb olundukda, [Ü3 128b] eşkıyâ ile müşâcere olunup, dört sâʿat kadar mâ-beyne'l-ferîkayn muhârebe vâkiʿ ve eşkıyâ tâb-âver-i mukāvemet olamayup, leylen Çernes Kasabası'nı terk ve Fethülislâm Kalası'na mündefiʿ olmalarıyla, Çernes Kazâsı bi'l-külliyye eşkıyâdan sâlim ve ekserîsi taleb-i emân ile seyyiʾât-ı sâbıkalarına nâdim olduklarından gayri, İbrâ'îl Nâzırı mevcûd-ı maʿiyyeti olan cünûd ile Sefârce etrâfında vâkiʿ kurâya raht-ı savlet ilkā ve Sefârce'de olan eşkıyâya bu keyfiyyet hüveydâ oldukda, mukābeleden ʿaczleri mütehakkak ve her biri bir cânibe müteferrik olup, mahall-i mezkûr dahi eyâdî-yi aʿdâdan intizâʿ ve Fethülislâm etrâfında bulunan bugātdan yedi-sekiz yüz nefer Arnabud ve sâyir eşhâsın berü tarafa ittibâʿ ile Pâsbân-oğlu askerine vehn ü zaʿf târî olduğunu Belgrad Muhâfızı Vezîr Mustafa Paşa istimâʿ eyledikde, bâzû-yı himmetine kuvvet ve dâʿiye-i şevkine metânet gelüp, Ada Kāyim-makāmı'na kifâyet mikdârı ecnâd ile iʿâne vü imdâd ve berü taraf askeriyle taʿyîn-i vakt-i kıtâl ve tasmîm-i hengâm-ı cidâl eyleyerek, iki koldan Fethülislâm Kasabası'nda ictimâʿ u ihtifâl etmeleriyle, derûnunda bulunan gürûh-ı liʾâm hîn-i tekābülde rû-tâb-ı semt-i inhizâm olup, o fırka-i bâgıyenin vâfiri maktûl ve baʿzısı [Ü4 55a] mukayyed ü maglûl olup, kasaba-i mezkûre dahi bu sûretle zabt olunduğu ahbâr-ı sârresi işbu Şevvâlü'l-mükerremin on yedinci ve on dokuzuncu günü târîhleriyle ʿale't-teʿâkub vârid ve Ada Kāyim-makāmı Mustafa Ağa'nın uğur-ı Pâdişâhî'de bürûz eden daʿvây-ı sadâkat ü gayreti vâreste-i ikāme-i beyyine vü şâhid olmağla, Kapucu-başılık Rütbesi'ne mütesâʿid olması husûsu Eflâk Voyvodası tarafından tahrîr ü ifade ve fi'l-hakīka o makūle sadâkat-kârân-ı devletin matlablarına müsâʿade, sâyirlerinin [Ü3 129a] hâhiş ü şevklerin ziyâde eyleyeceği bedîhî olmağla, lede'l-istîzân Ağa-yı mûmâ ileyhe Kapucu-başılık ihsân ve cihet-i uhrâ ile ferhân kılınup, Voyvoda-i mersûmun dahi bu bâbda zuhûra gelan gayreti ve tavâyif-i askerî beyninde muhâsede sebebi ile tekevvün eden şikāk u muhâlefeti tergībât-ı dest ü zebân ile safvete mübeddel kılması ve Kilâr-ı Pâdişâhî'ye fâr-ı gürsine gibi vüsûb eden eşkıyâyı iʿmâl-i asker ve bezl-i sîm ü zer ile tard u izâha eylemesi, timsâl-i iftihâr u iʿtibârına pîrâye ve evlâd u ahfâdına sermâye olacağı bî-iştibâhdır.