Bu sâl-i meyâmin-iştimâlde Mısr-ı Kāhire'nin havl ü kuvvet-i Bârî ile eyâdî-yi aʿdâdan intizâʿ u istihlâsı içün berren ve bahran tedârükât-ı kaviyyeye mübâşeret olunup, şart-ı ittifâka riʿâyet ve bilâ-ʿivaz kasd-ı iʿânet eden İngiliz Devleti donanması dahi mukaddemâ işâret olunduğu üzere vechile Rodos ve Megri sularına geldiği tehakkuk edüp, Kapudân-ı deryâ Vezîr Hüseyin Paşa hazretleri dahi meʾmûr-ı maʿiyyeti olan bahr u berr askerini Donanma-yı hümâyûn'a teşhîn ü imlâ ve İngiliz donanmasıyla bi'l-mürâfeka Mısır tarafına şirâʿ-güşâ olmuşidi. Ancak semt-i vâhidden Mısır'a hücûm olunduğu takdîrde düşmen âhar cihetlerden mutma'innü'l-bâl olup, kâffe-i kuvvetini bir tarafa sarf ile asker-i Pâdişâhî'yi işgāl eyleyeceği baʿîd ʿani'l-ihtimâl olmayup, bu sûretde aʿdâyı cânib-i berrden tazyîk ile askerlerini cihet-i vâhidden tefrîk, savâb-dîd-i erbâb-ı tedkîk [Ü4 54a] olup, bu keyfiyyet etrâfıyla Serdâr-ı ekrem ve Sadrıaʿzam hazretleri tarafına tenmîk olunmuşidi. Ordu-yi hümâyûn'un asker ve zahîre cihetleriyle tezâyuk u inziʿâcı derkâr ise dahi, mümkin mertebe tedârükât ile ilerülere doğru hareketi mûcibât-ı maslahat-ı mülkiyyeden olmağla, işbu Şevvâlü'l-mükerremin yedinci günü Sadrıaʿzam hazretleri Ordu-yi hümâyûn ile ʿArîş ve Gazze semtlerine tahrîk-i ikdâm-ı himmet ve donanmalar ile [Ü3 128a] bi'l-muhâbere muktezây-ı hâl icrâsına bezl-i vüsʿ ü tâkat eyleyeceğini tahrîr u işâret eyledi.