Devlet-i ʿaliyye muhâliflerinden şahs-ı vâhid, pister-i âsâyiş ü râhatda kāʿid olmayup, kuvve-i istidrâciyye ile bir zemân izhâr-ı mefâsid etse dahi, ʿâkıbet bir belây-ı nâgeh-zuhûra ibtilâ ile metâʿ-ı zindegânîsi kâsid ve şûrâbe-i hayâtı râkid olacağı hezâr-bâr tecribet-güzâr-ı uli'l-ebsârdır. Binâʾen-ʿalâ-zâlik Rumeli taraflarında bir müddetden berü seg-i herze-meres gibi geşt ve ʿibâd-ı zaʿîfetü'l-iyâda itâle-i dest eden gürûh-ı menhûs her hâlde me'yûs ve ne cânibe ʿazîmet eylediler ise [Ü4 52b] livây-ı şekāvetleri menkûs olup, meʾlûf oldukları tavr-ı bâgıyânelerinin nihâyeti ve sâlik oldukları tarîk-ı saʿbü's-sülûk gavâyetin gāyeti olmadığını teyakkun ve eyyâm-ı şitâda kendüleri tehassun edüp, üzerlerine me'mûr askere hâricde temekkün müteʿassir ise dahi, kudûm-i eyyâm-ı rebîʿ ile meʾmûrlara mecâl-i karâr ve askere istiʿdâd-ı kâr-zâr hâsıl olup, [Ü3 126b] mazhar-ı katl-i zerîʿ olacağların cezm ile nâdim ve tahsîl-i şefîʿ ile istibkāy-ı hayât semtine ʿâzim oldular. Tafsîli bu ki, refʿ-i Vezâret'iyle müddet-i medîde Gelibolu ve Tekfürdağı'nda münâsib meʿâş ile âremîde olan Halîl Paşa, tesvîlât-ı nefsâniyyeye mütâbeʿat ve dağlı eşkıyâsıyla mürâfekat eyleyüp, tahrîb-i bilâd ve taʿzîb-i ʿibâd misillü harekâtı iʿtiyâd ile müşârik-i ehl-i fesâd olup, tavr-ı İslâmiyân'a mugāyir halʿ-i ribka-i inkıyâda mütecâsir ve gümâştegân-ı Devlet-i ebed-bünyân, ekser-i ahyân ol şahs-ı nâ-sütûde-kirdârı hasr u izʿâc ile giriftâr-ı nâliş ü zârî edüp, bu uslûb-ı nâ-mergūb ile şâhid-i merâmı mahcûb ve her mahalde mağlûb u menkûb ve bilâhare nîze-i cân-sitân-ı kahr-ı Sultânî ile dem-i fâsid-i vücûdu meskûb olacağını bilüp, el-yevm Filibe kurâsında ictimâʿ eden serân-ı eşkıyâdan Kara Feyzî ve Cengci-oğlu ve sâyirleriyle meşveret ve ʿavâkıb-ı hâllerin mütâlaʿa ile izhâr-ı peşîmânî vü nedâmet etmeleriyle, nâ-çâr Vezîr Tayyâr Paşa tarafına irsâl-ı rukʿa-i şefâʿat ve Halîl Paşa'nın Vezâret'i ibkā ve sâyirleri şâyân-ı ʿafv-ı Hıdîv-i ʿâlem-ârâ olurlar ise, Rumeli'de her ne kadar dağlu eşkıyâsı var ise cümlesini isticlâb ve meʾmûr olacağları mahalle şitâb eyleyeceklerin tahrîr ve müşârun ileyh dahi Anadolu semtine bi-ecmaʿihim murûr ederler ise, [Ü4 53a] dâmen-i ʿafva teşebbüs eyleyeceğini ifâde ile taraflarına âdem tesyîr ve tetâbüʿ-i rüsül ü resâyil ile teʿahhüdleri karâr-gîr olduğu maʿrûz-ı ʿatebe-i hazret-i Cihân-dârî kılınmışidi. Rumeli taraflarında zîr-i destâna etdikleri ihâne her bâr sebeb-i iltihâb-ı âteş-i gazab-ı Husrevâne olduğundan gayri, îfây-ı teʿahhüd eyleyecekleri mevhûm ve istîmânları tahtında bir garaz-ı [Ü3 127a] mübhem olduğu maʿlûm olmağla, istîsâl ü tedmîrlerine ikdâm ve terk-i râhat u ârâm ile tesallutlarını bi'l-külliyye izâleye ihtimâm olunmak bâbında müceddeden hatt-ı hümâyûn-ı mehâbet-rîz sudûr olup, mazmûn-ı şevket-makrûnu bir kıt'a emr-i celîlü'ş-şâna idrâc u imlâ ve Vezîr-i müşârun ileyh tarafına ba's ü isrâ olundu.