Fransızlar seferi takrîbi ile vukūʿ bulan muhârebelerde ve bidâyet-i seferde cânibeyn memâlikinde bulunup, ahz u tevkīf olunan kimesnelerin mübâdelesi mizâc-ı tarafeyne evfak olduğunu Devlet-i ʿaliyye müttefikleri idrâk ile devleti tergîb ü igrâ ve cihet-i mesârıf ve külfet-i muhâfaza ve bâ-husûs üserây-ı İslâmiyye'nin istihlâslarında olan fâyide fikr ü mülâhaza olunup, sûret-i rızâ, mir'ât-ı vukūʿda hüveydâ olmuşidi. Binâ'en-ʿalâ-zâlik devlet müttefiklerinin defeʿâtle bu bâbda istimzâcı kazıyye-i mübâdeleyi intâc eyleyüp, Yedikulle'de ve Tersâne zindânında ve Galata'da bir hânede ve sâyir mahalde mahbûs olan üserânın ıtlâkları taʿmîm ve mukaddemâ esîrlerin umûrunu İspanya Maslahat-güzârı ru'yet eyler iken, bi'l-iktizâ memleketine iʿâde olunmuş bulunup, umûr-ı mezbûreyi Danimarka Maslahat-güzârı Epsi der-ʿuhde etmiş olduğundan, üserây-ı mesfûre ana îdâʿ u teslîm olunup, tedrîcî teslîm ü tesellüm mâddesi tanzîm ve Devlet-i ʿaliyye'nin ehl-i İslâm ve reʿâyâdan Mısır'da ve Fransa'da [Ü4 53b] olan kâffe-i üserâsının dahi sebîlleri tahliye olunmak üzere Epsi tarafından Paris'e terkîm olunmak tasmîm olundu. Devlet-i ʿaliyye üserâsı min-ciheti'l-ʿaded kesîr ve Françe esîrleri kıyâsen kalîl ü nezîr ise dahi, Françe esîrlerinin ekseri zuʿmlarınca rütbelülerinden olup, bu takdîrde fikâkda mefhûm-ı tekābül ve maʿnây-ı tebâdül iltizâm olunmayarak, [Ü3 127b] mevcûd-ı tarafeyn ne ise bilâ-istisnâ ıtlâk olunmak husûsu sevâmiʿ-i müttefikayna ilkā olundu.