Zağarcı-başı olan Mehmed Ağa bezâzet-i lisân ile mezmûm ve bu sebeble üftâde-i şifâh-ı husûm olduğuna binâʾen, birkaç defʿa nefy ile tarîkı semeresinden [Ü3 126a] mahrûm olmuşidi. Birkaç mâh mukaddem sebeb-i maʿlûm ile yine Zağarcı-başılık ile mükerrem olup, lisânını şahsına muzırr kelimât-ı lâgıyeden keff ve hasma ser-rişte verecek evzâʿdan istinkâf ile ihtiyâr-ı meslek-i selef etmek lâzım iken, baʿzı mahallere iddiʿây-ı teʿalluk ile izhâr-ı kibr ü nahvet ve katârda bulunanlara îrâs-ı fütûr u rehâvet etmekle, işbu Şevvâlü'l-mükerremin on altıncı yevm-i Ahad mûmâ ileyh maʿzûl ve Sinob cânibine mersûl kılınup, Zağarcı-başılık, hâlâ Seksoncu-başı olan Halîl Ağa'ya ve Seksoncu-başılık, Ordu-yi hümâyûn'da Turnacı-başı olan ʿOsmân Ağa'ya ve Turnacı-başılık, sâbıkā Kuds-i şerîf Ağası olan İbrâhîm Ağa'ya tevcîh olunup, huzûr-ı Kāyim-makām-ı ʿâlî-makām'da iktisây-ı hilʿat ile hâyiz-i rehîne-i meserret oldular.