Bundan akdem Kapudan Paşa hazretleri Ordu-yi hümâyûn'a varup, [Ü4 51a] Sadrıaʿzam hazretleriyle mülâkāt ve istihlâs-ı Mısır'a dâ'ir miyânelerinde sebk-ı müzâkerât edüp, re'y olunan hareket-i bahriyye vü berriyyenin icrâsı düşvâr olduğundan, deryâda ve Mısır etrâfında Donanma-yi hümâyûn ile bir müddet geşt ü güzâr [Ü3 125a] etdiyse dahi, hevâların fuhûleti ve telâtum-ı deryânın şiddeti sebebi ile fîmâ-ba'd o cevânibde seyr ü hareket müstelzim-i hüdûs-i âfet olduğundan, Donanma-yi hümâyûn'u Âsitâne-i saʿâdet'e îsâl ve mersây-ı tersâneye idhâl etmişidi. Bir mâh murûrundan sonra İngilizlü ber-mûceb-i ittifâk, istihlâs-ı Mısır'a şedd-i nitâk edüp, mükemmel donanmaları Devlet-i ʿaliyye sularına mütekārib olduğu ahbârı istirâk olunduğundan gayri, Devlet-i ʿaliyye ile tehaffuzî ve tecâvüzî ittifâklarını beyân ü ifâde ve bir ân akdem Kapudan Paşa hazretlerinin vusûlü içün Der-ʿaliyye'ye takrîr firistâde eylediklerine binâ'en, sagîr sefâyinden mâ-ʿadâ on sekiz kıtʿa sefînenin levâzımına nazar ve leyl ü nehâr tertîb ü techîzine saʿy-i evfer kılındığından başka, Levend Çiftliği Bostâniyân'ından ve Kılâʿ-ı tisʿa yamakānından ve Üsküdar'da müceddeden teʿallüm-i harb eden askerden üç bin kadar muʿallem asker ve müşârun ileyhin kendü bedeninden tahrîr eylediği üç bin beş yüz nefer piyâde ve Topçu Ocağı'ndan bir orta ve ʿArabacı Ocağı'ndan yarım orta sefâyine idrâc ve Depedelenli Vezîr ʿAlî Paşa maʿrifetiyle tahrîr ü ihrâc olunan iki bin Arnabud askeri dahi tahsîs olunan sevâhilin birine lede'l-vusûl anlar dahi sefâyine teşhîn olunmak tasmîm olunup, ancak on sekiz kıtʿa sefâyinin müddet-i yesîrede techîzi müteʿazzir olup, tîz elden tanzîmi mümkin olan [Ü4 51b] sefâyin ile Vezîr-i müşârun ileyh hazretlerinin hareketi ve sefâyin-i bâkıyyenin refte refte verâdan ʿazîmeti savâb-dîd-i erbâb-ı elbâb olup, binâ'en-ʿalâ-zâlik işbu Şevvâlü'l-mükerremin on birinci yevm-i Sebt müşârun ileyh hazretleri levâzımı tekmîl olunmuş sefâyine me'mûr-ı maʿiyyeti olan asâkir ile râkib ve on dördüncü [Ü3 125b] Pençşenbih günü Ak-deniz'e doğru sevk-ı merâkib edüp, Sadrıaʿzam hazretleriyle muhâbere ve her husûsu müşâvere ile muktezây-ı hâl icrâsına mübâdere eylemesi ve İngiliz donanmasıyla şart-ı ittifâka riʿâyet ve istihlâs-ı Mısır'a ikdâm ü himmet etmek vesâyâsı gûş-i hûşuna mengûş kılındı.