Şehriyâr-ı sütûde-âsâr hazretlerinin hemîşe sehâb-ı midrâr-ı ʿinâyetleri, kābil-i feyz ü istiʿdâd olanlar hakkında mütekātır ve ʿan-asl maksad-ı isnây-ı Mülûkâne'leri tahsîl-i teveccüh-i kalb ve celb-i hâtır olduğuna binâʾen, bu defʿa dahi ümmîd-i pâye ile dest-bâz-ı temennî vü niyâz olan zevâtdan İstanbul Pâyesi olup, sâbıkā Galata Kadısı Dürrî-zâde es-Seyyid ʿAbdullah Efendi'ye Şevvâl'in on birinci gününden ve yine İstanbul Pâyesi olup, sâbıkā Havâss-ı refîʿa Kadısı Mîr es-Seyyid Mustafa ʿİzzet Efendi'ye Şevvâl'in on yedinci gününden ve sâbıkā İstanbul Kadısı Nakîb-zâde es-Seyyid Ahmed Efendi'ye Şevvâl'in yirmi beşinci gününden iʿtibâr ile Anadolu Pâyeleri ihsân ve arz-ı fukarây-ı ümmîdleri mahzar u reyyân kılınup, sâbıkā Havâss-ı refîʿa Kadısı İbrâhîm Efendi-zâde ʿAbdullah Efendi'ye bi-hasebi't-tarîk Burusa Kazâsı teveccüh edüp, ancak müsinn ü ihtiyâr ve hükûmet-i şerʿiyye idâresinde [Ü4 50b] ʿaczi bedîdâr olduğundan, rızâsıyla hükûmet-i mezkûreden keff-i yed ve Edirne Pâyesi'n ganîmet ʿadd etmekle, mûmâ ileyhe bin iki yüz on altı [Ü3 124b] Muharrem'i gurresinden Edirne Pâyesi ve sâbıkā Galata Kadısı Feyzullah ʿAfîf Efendi'ye kezâlik târîh-i mezkûrda mutasarrıf olmak üzere Burusa Kazâsı ve Dâru'l-hadîs Müderrisi bulunan Yûsuf-zâde Şeyh Yûsuf Efendi'ye Selânik Kazâsı tevcîh olunup, mûmâ ileyhin tasarruf-ı mansıbda kudreti meslûb olmağla, Nâyib ile zabt-ı mansıb eylemesi taraf-ı Fetvâ-penâhî'den münâsib görüldü.