İşbu Şevvâlü'l-mükerremin dördüncü günü resm-i dîrîn [Ü3 123b] ve kāʿide-i pîşîn-i Devlet-i ʿaliyye üzere tevcîhât-ı hümâyûn vukūʿ bulup, orduda bulunan hademe-i Bâb-ı ʿÂsafî ibkā ve mukaddemâ Teşrîfatcılık Sâlim Efendi ʿazlinden hâlî [Ü4 49b] kalup, vekâleten idâresi Kethudâ Kâtibi ʿAbdî Bey'e tenbîh olunmuşidi. Asâleti o tarafda ʿİzzet Hasan Efendi'ye sezâ görülüp, Âsitâne'de olan vükelâ dahi kemâ-kân makāmlarında müstekarr ve Îrâd-ı Cedîd Defterdarlığı ibkāsıyla mutasarrıfı el-Hâc İbrâhîm Efendi müstebşir olup, Hubûbât Nezâreti'nden Cânib Efendi maʿzûl ve mansıb-ı mezkûr ile Re'îsülküttâb-ı esbak Ahmed ʿAtıf Efendi nâyil-i eʿazz-i me'mûl olup, Nişancılık ile Râsih Mustafa Efendi ve Defter Emâneti ile Firdevsî Efendi manzûr ve Büyük Rûznâmecilik ibkāsıyla Beyhân Sultân Kethudâsı Mehmed ʿÂrif Efendi ser-germ-i râh-ı sürûr olup, Feyzî Bey-zâde Mehmed Bey, Baş-muhasebe'ye nâyil ve Seyyid Mehmed Efendi, Şehr-emâneti ibkāsıyla ser-i menzil-i merâma vâsıl ve Tersâne Emâneti ʿÖmer Ağa'ya havâle ve Darb-hâne Emâneti ibkāsıyla Ahmed Şâkir Efendi, re’sü'l-mâl-i ʿizz ü rifʿate inâle olunup, Matbah Emâneti ile Yûsuf Âgâh Efendi tecdîd-i câh ve Arpa Emâneti ile Arnabud Hasan Efendi katʿ-ı râh edüp, Barut-hâneler, ʿAzîz Efendi'ye ibkā ve Anadolu Muhâsebesi ile Ahmed Câvîd Bey ihyâ olunup, Atlu Mukābeleciliği ile Selîm Sâbit Efendi feres-rân-ı meydân-ı iʿtibâr ve Haremeyn Muhâsebeciliği ile Kisve-i şerîfe Nâzırı Mehmed Efendi hilʿat-pûş-i iftihâr ve Yeniçeri Kitâbeti ile Sâlih Paşa-zâde Hüseyin Bey memnûn ve Sipâh Kitâbeti ile Kara Hâfız Efendi ve Silahdâr Kitâbeti ile leyl ü nehâr umûr-ı mühimme tahrîriyle evkāt-güzâr olan Âmedî Gālib Efendi hezzet ü beşâşete makrûn ve Cizye Muhâsebeciliği [Ü3 124a] ʿismetlü Hadîce Sultân [Ü4 50a] Kethudâsı Hüseyin Efendi'ye ihsân ve Mevkūfâtçılık ile Çukadâr Ağalık'dan muhrec Dervîş Efendi-zâde Mustafa Efendi şâdân kılınup, Masraf-ı Şehriyârî Kitâbeti, Cezâyir'e me'mûr ʿAbdünnâfiʿ Efendi'ye ve Kalyonlar Kitâbeti, Tayyâr Paşa maʿiyyetinde olan Rüşdî Efendi'ye kemâ-fi'l-evvel münâsib ü mahall görülüp, Mâliyye Tezkireciliği ile Sâhib Efendi'nin hâtırı mecbûr ve Küçük Rûznâme ile Mektûbî-yi Defterî Yûsuf Efendi mesrûr kılınup, sâyir menâsıb dahi ber-vech-i münâsib erbâbına ihâle ve baʿzılarının zarûretleri ʿatâyây-ı behiyye ile izâle olundu.