Bilâslı Mehmed Paşa'nın kuvve-i dâfiʿa ile şöhret-i şâyiʿası olduğuna binâ'en, [Ü3 119a] Rumeli taraflarında olan serkeşlerin imhâk-ı şikāk ve ibtâl-i nifâklarına ve bâ-husûs dağlı eşkıyâsını Rumeli kutrundan tard u izâhaya vücûd-i istiʿdâdını ekâbirân-ı devlet vazʿ u hareketinden istidlâl ü tahkīk ve ru’yet-i umûruna kāyim ve sâyir erbâb-ı hurûb u melâhim bu ʿazîmetin imzasını teşvîk eylediklerinden, bu maslahat-ı cesîmeye taʿyîn ve irâde-i devletin hafî vü celîsi tarafına tebyîn olunup, matlûbu olan asâkir ve muhtâcun ileyh olduğu nakd ü zehâyir kemâliyle tertîb ve fî-küll-i vakt ü ân husûlüne fedây-ı cân eylediği Rütbe-i celîle-i Vezâret ile tatrîb olunmuşidi. Müşârun ileyhin [Ü4 45a] meʾmûriyyeti ne netîce verdiği bâlâda muharrer ve fîmâ-baʿd bir maslahata yaramayacağı emr-i mukarrer olup, başında olan haşerâtı alup, mansıbına gitmek irâdesiyle tarafına fermân-ı âlî-şân baʿs ü tesbîl ve hakkında muzmer olan keyfiyyet-i te'dîb vaktine te'cîl olunup, irâde-i vâzıha-i devlet, Tebedelenli ʿAli Paşa'ya sırran tahrîr ü işâret ve tahsîl-i maʿnây-ı muvâfakat kılındığı esnâda müşârun ileyhin Manastır'a vusûlü ʿAli Paşa'nın mesmûʿu olup, der-ân-sâʿat müşârun ileyhe mektûb gönderüp: “Başında olan eşhâs ile Tırhala halkı seni istikbâl ve şehre idhâl eyleyecekleri muhâl-ender-muhâl olup, o makūleleri defʿ ve havâss-ı etbâʿınla varup çiftliğinde ikāmet ve îrâd-ı mansıbını Mütesellim tarafından mâh-be-mâh kabza mübâderet, hakkında mahz-ı hayr u ʿinâyetdir" deyü tahrîr eylediğine binâ'en, kulûb-ı evliyây-ı umûrda muzmer u mestûr olan refʿ-i Vezâret kazıyyesi dahi o aralıkda fiʿle çıkmış bulunmağla, Mübâşiri maʿrifetiyle şeref-yâfte-i sudûr olan emr-i hazret-i Pâdişâhî [Ü3 119b] vâsıl-ı semʿ-i intinbâhı olup, tıbk-ı meʾmûriyyeti üzere çiftliğine râhî ve münhall olan Tırhala Sancağı'yla Tebedelenli ʿAli Paşa mübâhî oldu.