İmtidâd-ı hengâm-ı esfâr ve teʿâkub-ı eyyâm-ı ceng u peykâr hasebiyle Devlet-i ʿaliyye'nin mesârıfâtı, vâridât-ı muʿayyenesine gālib ve umûr-ı gazv ü cihâda iʿânet ü imdâd, zıll-i vârif-i hazret-i Şehinşâhî'de müstazıll-ı râhat-ı zindegânî olanlara vâcib olduğuna binâ'en, esfâr-ı sâbıkada cârî olduğu gibi bi'l-cümle mukātaʿât-ı mîrî ve Haremeyn ve eshâmdan cebelü tertîbi ile levâzımât-ı seferiyye teshîl olunmak, karâr-gîr-i erbâb-ı reʾy ü tedbîr olduğuna [Ü4 45b] binâ'en, iki yüz yedi senesinde verilan mukātaʿât, nizâmı târîhinden evvel tevcîh olunmuş mukātaʿât muʿaccelâtından binde üçer nefer ve baʿde'n-nizâm tevcîh olunan mukātaʿâtın üç sene murûr etmişlerinden binde ikişer nefer ve cümle eshâmın gayr ez-tevcîhât-ı cedîde birer senelik fâyizlerinin nısfı ʿale's-seviyye “Cebelü” taʿbîriyle ahz olunmak üzere nizâm verilüp, zimmet pusulaları ve suver-i defâtir ve evâmiri ısdâr ve cümlesinin hâsılâtı altı bin altmış kîseye bâliğ olup, bu mebâliğ oldukça umûr-ı seferiyyeye medâr ve erbâb-ı istîfâya sebeb-i indifâʿ-ı endîşe vü efkâr olup, erbâb-ı mukātaʿâtdan hemân tahsîline mübâşeret ve Darb-hâne'ye teslîm ve iktizâ etdikçe bâ-sûret Îrâd-ı Cedîd tarafına nakl ve umûr-ı seferiyye tanzîm olunmak bâbında işbu Ramazân-ı şerîf evâsıtında iktizâ edenlere ʿilm ü haber taksîm olundu.