Müşârun ileyh mansıbı olan Adana'ya ʿazîmet ruhsatıyla Ordu-yi hümâyûn'dan refʿ-i bâr-ı sıklet etmişidi. Tebeʿât-ı sâbıkası maʿlûm olduğundan, havf-ı mücâzât ile Adana'ya ʿazîmetden istinkâf ve etrâf u eknâfdan cemʿ-i erâzil ü eclâf eyleyerek, bâʿis-i neşv ü nemâsı olan Ahısha tarafına kasd u insırâf üzere olduğu tevâtür bulup, defter-i vüzerâdan ismi terkîn ve Tokad'da mekân taʿyîn olunmuşidi. Müşârun ileyhin kalbinde muzmer olan [Ü3 118b] hâcise-i fesâd gün-be-gün müzdâd ve iki konağı bir eyleyerek Ahısha tarafına müteveccih olduğu haberi Vâlîsi tarafından ihbâr u îrâd olunup, o havâlî askeri taʿyîni ile Devlet-i ʿaliyye'den istimdâd eylediğine binâʾen, Erzurum Vâlîsi ve Kars ve Van muhâfızlarına ve Bâyezîd Mutasarrıfı'na sûret-i hâl ifâde ve Sâbit Paşa'dan refʿ-i mansıb ihtimâli olmayup, Şerîf Paşa'nın Ahısha'dan defʿ-i tesallutu cezmen taraf-ı Pâdişâhî'den irâde olunmağla, Paşa-yı mûmâ ileyhi min-külli'l-cevânib hasr u tazyîk ve şeml-i cemʿiyyetini tefrîk etmeleri bâbında taraflarına evâmir-i ekîde firistâde olunmuşidi. Şerîf Paşa ise seyr-i serîʿ [Ü4 44b] ve meşy-i zerîʿ ile Ahısha'ya tahsîl-i kurbiyyet ve cânib-dârlarını semt-i şekāvete daʿvet ile idhâl-i merkez-i cemʿiyyet eylediği mütehakkak ve Sâbit Paşa'nın mukābeleden ʿaczi ve meʾmûrların ʿadem-i lühûku ve ehâlînin havf-ı yağmâ-yı şehr ile fırkateyn olmaları, Şerîf Paşa'nın fesâd-ı zamîrine muvâfık düşüp, fi'l-hâl müstashabı olan erbâb-ı gavâyet ile Ahısha'ya tahrîk-i pây-i şûm eylediği Sâbit Paşa'ya maʿlûm oldukda, hâricden tedbîr ve sevâd-ı cemʿiyyetini meʾmûrlar ile teksîr içün Ahısha'yı terk ve Erzurum tarafına ıtlâk-ı zimâm-ı istiʿcâl ve Ahısha ehâlîsi dahi Paşa-yı mezbûru istikbâl ve bî-tekellüf eyâlete idhâl eyledikleri münhiyân-ı ahbâr taraflarından işʿâr olunmağla, mûmâ ileyhi ʿalâ-eyyi-hâl memleketden ihrâc u tedmîr zımnında meʾmûrlara tekrâr evâmir-i ekîde tesyîr olundu.