Mûmâ ileyh ʿâm-ı mâzîde İstanbul Kadılığı'na bi-hasebi't-tarîk müstaʿidd bulunup, taraf-ı Fetvâ-penâhî'den istimzâc ve: “Kazâya rızâsı var mıdır?” deyü meknûn-ı zamîri istihrâc olundukda, sûret-i ibâ ve kabûl-i hükûmetden istignâ göstermekle, tahtında [Ü3 117b] bulunan Mehmed Efendi o câh-ı bülend ile ercümend kılınmışidi. Taʿyîr-i ahbâb ve taʿyîb-i etrâb hasebiyle iʿrâz-ı mansıbdan nâdim ve bâdiye-i peşîmânîde mütehayyir ü hâyim olup, giderek merâk u mâlhulyâ ʿilletine mübtelâ ve bir zemân geşt-i esvâk ve devr-i kûçe vü zukāk eyledikden sonra, ʿarûz-ı sükûnet ile hânesinde inzivâ ve bi'l-külliyye terk-i mâ-sivâ edüp, bu hâlden dahi intikāl ve hânesini istiskāl ile ittisâlinde vâkiʿ tütüncü dükkânında mine's-sabâh ile'l-mesâ ikāmet ü sevâ ve âyende vü revendeyi temâşâ eyler iken, işbu Şaʿbân'ın onuncu Cumʿaertesi gicesi tekmîl-i enfâs-ı hayât ve ʿazm-i dâru'l-mücâzât eyledi. [Ü4 43b]