Mûmâ ileyh Balat'da sâkin Bürüncükcü-oğlu Câmcı ʿAbdî Çelebi'nin sulbünden elli bir senesinde tevellüd ve dayısı olan Hekîm Kanbûr ʿAbbas'ın hacr-i terbiyesinde tevessüd edüp, giderek fark-ı gass ü semîn ve temyîz-i har-mühre ve dürr-i semîn eyledikde, baʿzı kudât ve nüvvâbın umûrunu ru'yet ve doksan dört târîhinde Yenişehir Monlası bulunan Mesʿûd-zâde'ye Kethudâlık ile kesb-i kurbiyyet edüp, tabâbet takrîbi ile doksan yedi Şevvâl'inde Müderris ve iki yüz üç senesi Şevvâl'inin yirmi birinci günü Riyâset-i etıbbâ hidmet-i menîʿasıyla müteneffis ve iki yüz beş Zilhicce'sinin on sekizinci günü İzmir Mevleviyyeti ile manzûme-i ikbâli teştîr ve iki yüz yedi senesinde Edirne ve iki yüz dokuz senesi Zilhicce'sinde Mekke Pâyesi'yle çeşm-i ibtihâcı takrîr kılınup, iki yüz on bir Ramazân'ının üçüncü günü Hekîm-başılık'dan maʿzûl ve hânesinde ikāmetle duʿây-ı devlet-i Pâdişâhî'ye meşgül olup, ʿadem-i rağbetden vech-i meşrûh üzere Kazâ’-i İstanbul âhara ve mukaddem târîh ile [Ü3 118a] kendüye pâye tevcîh olunmuşiken, ʿillet-i nedâmet ve endîşe-i fevt-i maslahat dimâğına îrâs-ı halel ve vasiyyeti üzere Üsküdar'da Nasûhî Tekyesi'nde zîr-i hâk-i siyâhı mesken ü mahall eyledi. Mûmâ ileyhin hilye-i fazl ü maʿrifetden muʿarrâ olduğu her çend zâhir ü hüveydâ ise dahi, fenn-i tabâbetde eli ve kesret-i âzmâyiş ü tecribe ile teşhîs-i marazda medhali var idi. Bu sâl icinde Mekke Pâyesi olan Keşşâf ʿÖmer Efendi dahi vefât edüp, mûmâ ileyh Murtazâ Efendi'nin altmış yedide vâkiʿ imtihân-ı sânîsinde Müderris olup, doksan dörtde Haleb ve iki yüz birde Mısır Kadısı olup, kuvve-i mâliyyesi sebebi ile Haremeyn [Ü4 44a] teklîfinde îrâd etdiği ʿillet-i ʿarec ʿözr-i leng makāmında tutulup, on sene metrûk u muʿattal ve ʿÂşir Efendi meşîhatinde rahmen li-hâlihî Mekke Pâyesi'yle mübeccel ve sâl-i mezkûrda câme-i hayâtı derîde-i dest-i ecel oldu. Mûmâ ileyh fazl ü ʿilm ile müştehir ve sitem-i tarîk ile âzürde-hâtır olmuş bir pîr-i rûşen-zamîr idi.