Silahdâr Ağası olan Hüseyin Ağa işbu Ramazân gurresinde diyâr-ı ʿademe kufûl ile mansıbı mahlûl ve birkaç gün mukaddem Kapucu-başılık Rütbesi'ne mevsûl olan Vânî Mehmed Paşa yeğeni Feyzî Bey o mansıb-ı celîle menkūl kılındı. Müteveffây-ı mûmâ ileyh Ruscuk sükkânından olup, eyyâm-ı civânîde sevk-ı sâyık-ı kader ile Âsitâne'yi makarr edüp, Lâleli Mustafa Efendi'ye intisâb ve dâyiresinde neşv ü nemâ iktisâb edüp, baʿde' [Ü4 43a] l-müfâraka seferde Dağıstânî ʿAli Paşa'ya Devâtdâr ve baʿdehû Kethudâ ve çok geçmeden Kapucu-başılık ile nâmdâr olmuşidi. Seferden sonra Âsitâne'ye gelüp, me'mûr olduğu hidemâtda sadâkati muʿayyen ve bâ-husûs katʿ-ı hudûd ve Vidin mâddesinde meşakkati mübeyyen olup, ʿâkıbet şedâyid-i hıdmet, vücûduna îrâs-ı ʿillet ve siniyy-i ʿömrü altmış beş râddelerine resîde olarak ʿazm-i dâr-ı âhıret eyledi. Mûmâ ileyh ilmâm-ı zayf-ı şeybden tâfte-rûy-ı inkıbâz olup, sevâdı beyâza ve leyli sabâha tercîh ve ayda bir kerre rîş-i sefîdini eczây-ı siyâh ile tesrîh edüp, zâtında gayret ve tabʿında istikāmet rüsûh bulmuş cerî vü cesûr ve dânende-i dekāyık-ı muʿzamât-ı umûr bir şahs-ı kâmilü'ş-şuʿûr idi.