Devlet-i ʿaliyye-i ebediyyü'l-karâr ile râbıta-i ittifâka istihkâm veren İngilterelü'nün Fransızlar ʿaleyhine bu defʿa yirmi beş bin kadar kara askeriyle meşhûn techîz eyledikleri bir takım donanmaları Rodos ve Marmaris ve Megri ve Mısır sularına gelmek üzere olduğu ihbâr-ı [Ü3 114a] sikāt ile resîde-i derece-i tahkīk olmağla, zikr olunan askere iktizâ eden meʾkûlât ve meşrûbâtın civâr kazâlardan bilâ-teʾhîr u ʿavk tedârük ü sevk ve Megri ve Kıbrıs iskelelerinde tehyi'e vü cemʿ ve narh-ı cârî ve muʿtedil behâ ile beyʿ etdirdüp, zikr olunan askere zarûret ve mâ-lezimeleri tanzîminde sıklet çekdirmemek içün ricâl-i Devlet-i ʿaliyye'den bir zât-ı müteʿayyinin me'mûriyyeti lâzım gelüp, binâ'en-ʿalâ-zâlik Divân-ı muʿâllâ-erkân'da bi'l-fiʿl Çavuş-başı olan Seyyid Mustafa Beyefendi'nin ʿakl ü rüşdü zâhir ve bu makūle hutûb-ı cesîmede hüsn-i idâresi mücerreb-i ekâbir olmağla, mahzâ karîha-i sabîha-i Mülûkâne'den bu maslahatın tesviye vü tanzîmine me'mûr olup, işbu Recebü'l-ferdin on yedinci Pençşenbih günü huzûr-ı [Ü4 40a] Kāyim-makāmî'de dûş-i gayret-pûşu hilʿat-ı zâhire ile tezyîn ve sâbıkā Hubûbât Nâzırı ʿAzmî Ahmed Efendi sülüs-i mahsûl ile hıdmet-i vekâlete taʿyîn olundu.