ʿArîş cenginde şehîd ve ʿâlem-i hestîden mefkūd u nâ-bedîd olan Değirmenci-oğlu Mustafa Paşa'nın dâyiresi halkı perîşân olmamak maslahatı içün Kethudâsı İsmâʿîl Ağa Vezâret'e şâyân görülüp, Mevkib-i hümâyûn ile Mısr-ı Kāhire'ye hatve-cünbân olmuşidi. Sûret-i ma'lûme ile Mısır'dan ʿavdet olundukda, nefs-i Mısır'a duhûl ile ceng-i aʿdâya meşgūl olanlara imdâd etmek üzere Ordu-yi hümâyûn'dan taʿyîn olundukda, defʿ-i me'mûriyyet kasdıyla başında ictimâʿ eden haşerâta nefsini teslîm ve kendüsini takyîd ile Cezzâr Paşa tarafına götürmelerini taʿlîm etmişidi. İcrây-ı teʾdîbine mekân ü zemân müsâʿid olmayup, letâyifü'l-hiyel ile ihlâki rekîz-i zamîr-i Sadr-ı müşterî-tedbîr olup, mansıbına ʿazîmet [Ü3 114b] irâdesiyle emr-i ʿâlî ısdâr ve birkaç bin dağlı ve Arnabud ve sâyir eşhâs ile ʿinân-tâb-ı idbâr olup, vardığı mahallerde ʿibâd-ı zaʿîfü'l-iyâdı endâhte-i çâh-ı baʿîdü'l-gavr-ı âzâr u cevr ve her tarafa itâle-i dest-i bî-dâd u gadr eyleyerek, Marʿaş'a tekarrübünde Celâlî sûretinde olan askerine takat gelmeyeceğini Marʿaş ehâlîsi tefekkür ile pâ-ber-cây-ı merkez-i tebassur ve tarafına rüsül ü resâyil irsâl ve bu reftâr ile şehre duhûlünde âşûb u fesâd tekevvünü agleb-i ihtimâl olduğunu dehlîz-i sâmiʿasına idhâl eylediklerinde, dâmen-efşân-ı ʿucb u gurûr ve cebren ve kahren şehre duhûl edeceğini beyân ile sâlik-i meslek-i şerr ü şûr olup, bu takdîrde ehâlî mecbûr-ı mukābele ve miyânede âlât-ı [Ü4 40b] muhârebe münâvele ve Paşa askerinde âsâr-ı perîşânî vâkiʿ ve üftân ü hîzân Kasaba-i ʿAyntâb'a râciʿ olmalarıyla, hâdise-i mezkûre tarafeynden Ordu-yi hümâyûn'a tahrîr ve Sadrıaʿzam hazretleri sûret-i zâhirde ehâlîyi tahzîr ve vâlîlerini şehre idhâl ile hükm-i Cihân-mutâʿa inkıyâdlarını tahrîr ve hufyeten müşârun ileyhi bir takrîb şehre idhâl ile istîsâl ü tedmîr etmek vesâyâsını vücûh-ı beldeye ifâde vü tezkîr edüp, maslahateyn-i mezkûreteyni icrâ zımnında Sadrıaʿzam hazretlerinin Cebehânecisi lâzım gelan evâmir ü tahrîrât-ı celiyye vü hafiyye ile ol savba isrâ ve müşârun ileyh Marʿaşlu'nun mukaddemce vukūʿ bulan mukābelesini zerîʿa eyleyerek şehre duhûlden istinkâf eyler ise, Karahisâr Sancağı ilhâkıyla Adana Eyâleti menşûru dahi merkūma ber-vech-i ihtiyât vedîʿa kılınmışidi. Bu tarafdan müşârun ileyh tekrâr cenge teʾehhüb ve ʿAyntâb Voyvodası Hüseyin Ağa'yı tesahhub ile [Ü3 115a] şehre tekarrüb edüp, Devlet-i ʿaliyye'nin irâde-i zâhire vü bâtınesi dahi o hilâlde ehâlîye münkeşif olmağla, vücûh-ı belde idâre-i pergâr-ı efkâr ve ʿAyntâb Voyvodası'nı bu cemʿiyyetden tefrîk içün yalnız kapu halkıyla şehre duhûlünü sûret-i niyâzda işʿâr eylediklerinde, şartı kabûl ve mûmâ ileyh ihtiyâr-ı semt-i ʿavd ü kufûl edüp, müşârun ileyh ihtimâlâtı selb ve mutma'innü'l-kalb şehre duhûl eyler iken, mukaddemce tertîb ve tahbiye olunan Marʿaş askeri ve cibâlden celb olunmuş süvâriyân-ı ʿaşâyir müşârun ileyhin etrâfını istîʿâb ve başında müctemaʿ olan eşhâsın ekserîsini üftâde-i hufra-i helâk ü tebâb ve kendüsi üç nefer bedbaht ile mütenekkiren Küçük ʿAli-oğlu tarafına firâr eylediği, Ordu-yı hümâyûn tarafına [Ü4 41a] ihbâr olunup, ahz u istîsâli içün her tarafa evâmir-i ʿaliyye ibʿâs ve icrây-ı lâzime-i tergîb ü ihsâs ve ʿâle'l-husûs ʿAyntâb Voyvodası Hüseyin Ağa'ya firârî-yi merkūmu teftîş ve buldurup ser-i maktūʿunu irsâl eylediği hâlde güzeşte cürmü ve orduya olan me'mûriyyetinin ʿafvı vaʿd ü işrâb olunduğu Sadr-ı vâlâ-cenâb tarafından maʿrūz-ı Rikâb-ı müstetâb kılınup, tahdîş-i zihn-i şerîf ve hâmil eden işbu emr-i hâyil fazl-ı Bârî ve yümn-i baht-ı hazret-i Tâc-dârî'yle ber-vech-i sühûlet mündefiʿ ü zâyil oldu.