Râgıb Paşa Sadâreti'nde Hind iklîminde kâyin tavâyif-i mülûkdan biri Ka'be-i mükerreme'yi setr içün kisve irsâl etmek ruhsatına tâlib ve bu mâdde içün mahsûs bir âdemi âyib olmuşidi. “Devlet-i ʿaliyye'den dahi Mekke-i mükerreme'nin Kisve-i şerîfe'sine sarf olunacak mebâliğ-i mesârıfât, mürettebe-i Devlet-i ebed-müddet'den olup, beher sâl tecdîd ve ol bukʿa-i mübarekeye [Ü4 39b] irsâl olunageldiği zâhir ü bedîddir. Ancak iklîm-i Hind'den senevî birkaç bin kadar ʿuryân Hindûler üftân ü hîzân Memâlik-i mahrûse'ye münteşir olup, sanʿat-ı deryûze-gerî ile nâsı taʿcîz ü tasdîʿ ve suʾâlleri sâyir erbâb-ı gedye suʾâline müşâbih olmayup, talebde hukūk-ı sâbite ashâbı gibi halkı âzürde vü takrîʿ etmeleriyle, o makūle ʿuryân ve sergerdân Hindûler'i bu tarafa gelmekden menʿ ile o tarafda itʿâm ü iksâ, kasd u niyyet eyledikleri hayırdan evlâdır” deyü cevâb-nâme tahrîr olunduğu yâd-dâşt-ı erbâb-ı nühâdır.