Diyâr-ı Hind'de vâkiʿ “Arfot” nâm memleketin hâkimi Behâdır Hân yedi sene mukaddem ‘atebe-i felek-mertebe-i Şâhâne'ye hediyye tarîkıyla birkaç bokça akmişe-i Hindiyye tertîb ve maʿrûzât-ı sâyiresiyle bahran İngiltere'ye ve andan Âsitâne'ye îsâl olunmasını zihninde istihzâr u takrîb edüp, sâhil-i Hind'den birkaç mîl infisâlinde derûnunda hediyye olan sefîneyi Fransız korsanı gasb ve birkaç gün murûrunda İngiltere beyliklerinden biri zikr olunan korsan sefînesine tesadüf edüp, fi'l-hâl sefîneyi ve derûnunda olan hediyyeyi ahz ve İngiltere'ye îsâl etmişler idi. Bir müddetden sonra İngilterelü'nün sevâhil-i Hind'de kâyin vükelâsından hediyye-i Behâdır'ı Âsitân-ı ebed-bünyân-ı Şehinşâhî'ye takdîm olunmuş olduğu tahrîr olunduğuna binâʾen, İngiltere Kıralı der-ân-sâʿat hediyye-i mezkûreyi ve Hân-ı mûmâ ileyhin maʿrûzâtını Âsitâne-i saʿâdet'e gönderüp, lede'l-vusûl elçisi maʿrifetiyle Dergâh-ı vâlâ'ya takdîm ve mahalline teslîm olunup, Fârisiyyü'l-ʿibâre maʿrûzâtı dahi terceme [Ü4 39a] olundukda, Hân-ı mûmâ ileyh şeref-i İslâm ile mümtâz ve 'alemü'ş-şark olan hazret-i ʿAbdülkadir Ceylî evlâdından olarak nesebi sülâle-i tayyibe-i hazret-i Fârûkī'ye müntehî olduğunu îmâ ile Haremeyn-i muhteremeyn'de âbâ vü ecdâdına erzânî kılınan hidmet-i ferâşet ile ser-firâz olunmasını niyâz ve Kaʿbe-i mükerreme'nin baʿzı mahalleri tarafından zer-hall ile nigâşte kılınmak ve Hind hâcıları rencîde olunmayup, kasd-ı mücâveret ile ikāmet edenlerden biri fevt oldukda, terekesine şürefâ ve vülât ve Beytülmâl tarafından taʿarruz olunmayup, müteveffânın veresesine verilmek içün rufekāsına teslîm olunmasını recâ vü istidʿâ eylediği evâmirin müsveddelerini merâmına tatbîk ile tahrîr ü isrâ eylemiş. Bu makūlelere ferâşet-i şerîfe hidmeti verildiğinin kaydı tetebbuʿ u istikrâ olunup, zemân-ı sâbıkda ehâlî-yi Hind'den Sirâcüddevle Mehmed ʿAli Hân mahlûlünden Mehmed ʿAli Hân Behâdır'a ve Mehmed Nizâmeddîn'e ferâşet-i şerîfe berâtı verildiği mukayyed ise dahi, [Ü3 113b] baʿzı mülâhazaya binâ'en mûmâ ileyh hakkında hıdmet-i mezkûre tecvîz olunmayup, Kaʿbe-i mükerreme dahi zer-hall ile nakş ü nigârdan müstagnî olup, ancak mücâvir ve zâyirleri hakkında vâkiʿ olan mes'ûlâtına müsâʿade ve Şerîf-i ʿâlî-şân'a ve Mekke-i mükerreme ve Medîne-i münevvere kadılarına ve Cidde Vâlîsi'ne ve Şeyhu'l-harem'e hitâben evâmir-i ʿaliyye firistâde olundu.