Cezîre-i mezkûre Bahr-i Sefîd'de İfrîkıyye ile Çiçilya Cezîresi beyninde vâkiʿdir. Tûlen sekiz ve ʿarzan dört sâʿat kadar imtidâd ile müstahkem bir adadır. Medhal-i sefâyin olan lîmânın tarafeynine adadan [Ü3 112a] iki burun mümtedd olup, kenârlarında birer kalʿa binâsıyla sefâyin-i ecânibe sedd-i metîn ve maʿkıl-ı hasîn olmuşdur. Lisânları İtalya ve Magrîbî'den muharref bir lisân olup, bağ ve üzüm ve penbe misillü mahsûlü vardır. Hınta ve hatab nâdir olup, tûlü otuz bir buçuk derece ve arzı otuz altı derecedir. Ve dört kıtʿa kalyonları ve otuz-kırk cengçi alur iki direkli ve zâd ü zahîre celbi içün küçük sefîneleri elli kıtʿaya bâliğ olur. Cezîrenin yedi bin askeri olup, nısfı berrde ve nısfı bahrda kullanılur. Cezîrede dört şehirleri olup, “Tranova” dedikleri şehir metîn ü müstahkemdir. Rodos Cezîresi fethinden sonra kurtulan kefere gelüp, bu cezîrede temekkün edüp, Devlet-i İslâmiyye'ye [Ü4 38a] sedd olmak üzere Papa ve Papa'ya tâbiʿ millet-i Nasârâ'nın imdâd u iʿânetleriyle Ak-deniz'de etdikleri fesâdât maʿlûmdur. Ve Malta halkı dört kısma münkasem olup, Nemçe ve İspanya ve İtalya ve Françe bölükleri taʿbîr olunur milel-i sâyireden bunlara tebaʿiyyet eder oldukda, dört bölükün birine girüp, andan maʿdûd olur. Bu cezîre halkı Nasârâ miyânında serbest ve gayr-i mahkûm ve kemâl-i istiklâlleri vardır. Hâkimleri ki, “Gran-mayster” taʿbîr olunur. Hâlik oldukda, dilediklerini intihâb ve kendülerine hâkim nasb ederler. Ve dâyimâ ehl-i İslâm ile muhârebe üzere olduklarından, İtalya ve sâyir Papa âyînine tâbiʿ mülûk-i Nasârâ diyârında Papa-yı mersûm, mesfûrlara evkāf u idrârât vazʿ u taʿyîn etmişdir. Ak-deniz'e korsanlık içün ihrâc edecekleri sefîneleri Malta'da tüccâr-ı Efrenc donadup, mesârıflarını ru'yet ve ‘avdetlerinde her ne ki kesb etmişler ise, humusunu Malta Hâkimi'ne ve nısfını sefîne [Ü3 112b] halkına ve nısf-ı âharını zikr olunan tüccâra verüp, ba'zan fâyide ve baʿzan zarar ederler.