Bu sâl-i meyâmin-iştimâlde dahi Kisve-i şerîfe, Sultân Ahmed Câmiʿi revâkında sunʿ-ı hüsn ve nehc-i müzeyyen üzere nesc ü itmâm olunduğu huzûr-ı mevâhib-mahsûr-ı Şâhâne'ye ʿarz u ifhâm olunmuşidi. Şehriyâr-ı müstahsenü'l-âsâr dâme mâ-dâme'l-felekü'd-devvâr hazretleri Kisve-i şerîfe'ye kemâl-i hürmet ü iʿzâz irâdesiyle ʿâm-ı mâzîden efzûn alay tertîb olunmasını emr ü fermân buyurduklarına binâ'en, işbu Recebü'l-ferdin üçüncü yevm-i Hamîs Şeyhulislâm ve Dâru's-saʿâde Ağası ve Kāyim-makām Paşa ve Bâbü's-saʿâde Ağası hazerâtı ve Sadreyn ve Nakībüleşrâf ve İstanbul Kadısı ve Menâsıb-ı Sitte erbâbı ve Kethudâ Bey'den gayri kapu ricâli ve rikâb ağaları ve Kapucu-başı ağalar ve zuʿamâ ve çavuşân, Sultân Ahmed Câmi'inde hâzır oldukları hâlde Kisve-i şerîfe kemâl-i tevkīr ü tebcîl ile bîgāle tahmîl olunup, meşâyıh ve mü'ezzinân tezkîr ü tehlîl sadâlarını eyvân-ı Keyvân'a resân eyleyerek Serây-ı hümâyûn'a varılup, Kızlar Kapusu pîşgâhında Ayasofya Şeyhı ve Süleymâniyye Şeyhı birbirini vely eyleyerek, nusrat-ı asâkir-i İslâm ve devâm-ı ʻömr ü Saltanat-ı [Ü4 33a] Pâdişâh-ı Dârâ-gulâm duʻâlarına hıtâm verdikleri hengâmda kisve-i kudsü iltisâm ve mevkıʿ-i eşrefine îdâ olunup, erbâb-ı alay mekânlarına ʿazm u hırâm eylediler.