Es'ad Efendi-zâde Şerîf Efendi'nin meşîhatinde Perdeci ve erbâb-ı hırs u emele Çerhacı olan Burusalı Hasan Efendi, Burusa'nın Dâhil müderrislerinden iken himmet-i mahdûm ile Devriyye Mevleviyyeti'ne nâyil ve Diyârbekir ve Bağdâd ve iki defʿa Filibe'yi zabt ile fâka vü zarûreti zâyil olmuşidi. Geçen sene sebeb-i maʿlûm ile Haleb Mevleviyyeti'ni ihtilâs ve rûz u şeb dil-beste-i saydı olduğu nahçîr-i merâmı iftirâs edüp, galebe-i tekāzây-ı sefeh ve belki kemâl-i hırs u şereh iktizâsıyla baʿde'l-inʿizâl Ordu-yi hümâyûn tarafına şedd-i rihâl ve Sadriaʿzam hazretlerini taʿcîz ü tasdîʿ ile Edirne Pâyesi'n tahrîr etdirdikden sonra, Âsitâne'ye râhî ve tahsîl eylediği mektûbu ʿarz-ı huzûr-ı hazret-i Fetvâ-penâhî edüp, bilâ-tarîk Haleb Mevleviyyeti'ne vusûlünün gayzı henüz havâtır-ı [Ü4 32b] ʿulemây-ı aʿlâmdan zâyil olmadığına binâ'en, taraf-ı Şeyhulislâmî'den husûl-i matlabı vakt-i mukaddere taʿlîk u tesvîf ve etrâfı taʿcîz ü istişfâʿ nefyini îcâb eyleyeceği [Ü3 107a] bi'l-müvâcehe beyân ile inzâr u tahvîf olunmuşiken mütenebbih olmayup, tahsîl-i pâye vü menzilet zımnında baʿzı mahall-i hatîra mürâcaʿat ve mâ-lâ-yaʿnî kelimât tefevvühüne cesâret eylediği tehakkuk etmekle, taraf-ı hazret-i Fetvâ-penâhî'den bir mahalle nefyi telhîs olunup, yevm-i mezkûrda mûmâ ileyh Sinob'a tagrîb ile te'dîb olundu.