Ordu-yi hümâyûn Nüzül Emâneti ile Sadrıaʿzam hazretlerinin bi'l-maʿiyye istıshâb buyurdukları Selânikî Hasan Ağa, hıdmetinde izhâr-ı sadâkat ve tahliye-i Mısır mukāvelesinde ʿalâ-tarîkı'r-rehn Françelü tarafında ikāmet ile mübtelây-ı meşakkat olup, me'mûr olduğu Nüzül Emâneti'nin idâresinde tâkati kalmadığını beyân ve Âsitâne'ye ʿavdet ve maʿa'z-zamm Gümrük Emâneti ile ez-ser-i nev kesb-i tâb ü tüvân etmek husûsunu âverde-i zebân-ı tibyân etmekle, mes'ûlüne müsāʿade olunmak niyâzıyla Âsitâne-i saʿâdet'e iʿâde kılınmışidi. Ancak Gümrük gibi cesîm mukātaʿanın ümenâya ilzâm ü tefvîzi hengâmında istihsâl-i nefʿ-i mîrî iltizâm olunduğundan, Ağa-yı mûmâ ileyhin [Ü3 105a] bu defʿa taleb-kâr olduğu emtiʿa ve tevâbiʿi gümrüğüne ne mikdâr zamm eyleyeceği [Ü4 30b] istifsâr olundukda, ʿan-asl kasd ü niyyeti Devlet-i ʿaliyye'ye sıdk u hulûs ile hıdmet olduğundan, yüz yetmiş beş bin guruş zamm edeceğini ve zamm-ı mezkûr altışar buçuk sene muʿaccele ve beşer kîse fâyiz ile yetmiş tâm sehm iʿtibâr olunup, nisvân u ricâlden tâliblerini bulup, refte refte fürûht ve muʿaccelâtından hâsıl olacak iki bin iki yüz yetmiş beş bin kîseyi umûr-ı seferiyyeye sarf içün ceste ceste Îrâd-ı Cedîd Hazînesi'ne teslîm eyleyeceğini ifâde etmekle, gümrük eshâmında muʿteber olan şurûta tatbîkan işbu on beş senesi Mart'ı ibtidâsından iki taksît ile fâyizi istîfâ olunmak şartıyla lede'l-istîzân kāyimeleri terkīm ve Ağa-yı mûmâ ileyhe teslîm ve işbu Cumâdelâhıre'nin sekizinci İsneyn günü kapuya da'vet ve on altı senesi Mart'ından zabt şartıyla Gümrük ve tevâbiʿi Emâneti içün dûş-i sadâkatine ilbâs-ı hilʿat olundu.