Tevazzuʿ-ı cemâʿat-i Müslimîn içün Sinân Paşa Köşkü tahtında vâkî Harem havlîsinde ʿan-asl şâdırvân binâ olunmuş olup, zîk-ı mecâl sebebi ile mütevazzî ve züvvâra harac u zahmet târî olmağın, zikr olunan şâdırvân câmiʿ-i şerîf havlîsi vasatına nakl olunup, bu cihetle ümmet-i Muhammed'e sühûlet ve Harem havlîsine vüsʿat geldiğinden gayri, ahvâl-i zarûriyye-i beşeriyyeden olan kazâʾ-ı hâcet içün mebnâ olan künüf dahi ʿan-asl bir mahall-i gayr-i münâsibde binâ olunmuş olduğundan, hâric-i harem-i câmiʿde müceddeden künüf-i müteʿaddide binâ olunup, o makām-ı mübâreke hürmet ve şart-ı edebe riʿâyet olundu. [Ü3 104b] Eyyâm-ı şitâda câmiʿ-i şerîfe ferş olunacak halıların tûl ve ʿarzları mahallerine tatbîk ile ʿUşşâk Kasabası'nda [Ü4 30a] ezhâr-ı gûnâ-gûn ve elvân-ı bedâyiʿ-numûn ile nesc ü nakş ve ol bukʿa-i latîfeye ferş olunduğundan gayri, pîrâmen-i câmiʿ-i şerîfe hatt-ı celî ve zer-hall ile âyât-ı Furkāniyye tenmîk ve Sadrıaʿzam ve Dâru's-saʿâde Ağası ve Kāyim-makām Paşa hazerâtı ve Silahdâr-ı hazret-i Şehriyârî ve Hazînedâr Ağa ve Hazîne Kethudâsı Ağa tarafından takdîm olunun sîm âvîzeler dahi vâhiden-baʿde-vâhidin mahallerine inâte vü taʿlîk olundu. Câmiʿ-i mezkûr hâricinde müceddeden baʿzı dekâkîn ve mesâkîn binâ olunduğundan, o etrâf gereği gibi maʿmûr u âbâd ve cemāʿat-i Müslimîn'e sebeb-i kesret ü izdiyâd olduğundan gayri, tezāʿuf-i ecr niyyeti ile ekāsî-yi emkineden musallîlerin fevc feve vürûdları manzûr ve ol fırka-i nâciye aʿkāb-ı salavâtda nekāvet-i sudûr ile Bânî-yi sânî olan Şehriyâr-ı kâmilü'ş-şuʿûr hazretlerinin edây-ı ferîza-i duʿây-ı ʿömr ü devletlerine mecbûr olmuşlardır.