Bi'l-fi'l Re'îsülküttâb olan Râsih Mustafa Efendi Âsitâne'ye 'avdet içün bundan akdem tahsîl-i izn ü ruhsat ve şâyeste-i hidmet-i Riyâset, bir sâhib-i meleke vü liyâkatin taʿyîni taraf-ı Âsafî'den işâret olunmuşidi. Rikâb-ı hümâyûn'da Beylikçi olan Mahmûd Efendi hayr-hâhân-ı Saltanat taraflarından [Ü4 21a] o câh-ı refîʿa sevk u tergîb ve mazhar-ı inʿâm-ı Şehriyâr-ı vâlâ-makām olarak Ordu-yi hümâyûn'a tesrîb olunmuşidi. İmdâd-ı bâd-ı kabûl ile işbu Rebîʿulâhır evâyilinde muʿasker-i Sultânî'ye vusûl buldukda, bi'l-fiʿl Re'îsülküttâb nasb ü taʿyîn ve Re'îs-i sâbıkın oğlu ʿAbdüşşekûr Efendi mukaddemâ bi'l-istîzân Âsitâne'ye gelüp, hidmeti metrûk ve ʿazîmeti meşkûk olduğuna binâʾen, etbâʿ-ı Sadâret-penâhî'den mukaddemâ Mâliyye Tezkirecisi olan Sâlim Efendi, mûmâ ileyhe [Ü3 96a] câ-nişîn kılınup, münhall olan Mâliyye Tezkireciliği, sâbıkā Mektûbî Baş-halîfesi Mâhir Efendi'ye ihsân ve Cebeciler Kitâbeti ile Divrikli Ahmed Efendi'nin oğlu olup, bu defʿa Mektûbî Odası'ndan Ordu-yi hümâyûn'a irsâl olunan Tahsîn Efendi şâdân kılınup, Büyük Kalʿa ile hâlâ Mektûbî Baş-halîfesi olan ʿAbdülhamîd Efendi tatyîb ve Küçük Kalʿa ile Nâşid Efendi terhîb ve Âsitâne-i saʿâdet'de Beylikçi Kîsedârı olan Muhibb Efendi, Rikâb-ı hümâyûn Beylikçiliği ile tatrîb olundu.