Rumeli'de serserî geşt ü güzâr ve ʿibâd-ı zaʿîfü'l-iyâda îsâl-i zarar u hasâr eden şekāvet-şiʿârlara Vidin Muhâfızı'nın nihânî iʿâneti ve ikāmet ü hareketlerinde küllî müzâhereti yakīnen maʿlûm olup, tedmîr-i eşkıyâ irâdesiyle Silistre Vâlîsi Vezîr Mûsâ Paşa ve Tırhala Mutasarrıfı Vezîr Bilâslı Mehmed Paşa taʿyîn olunup, mahall-i ictimâʿları olan emâkinde birkaç defʿa kıtâl ve ʿale'l-husûs Tırnova Kasabası'nda merreten-baʿde-uhrâ ceng ü cidâl vukūʿuyla Tırhala Mutasarrıfı tarafından kasaba-i mezkûre tahliye ve vücûd-i levs-âlûd-ı muhâlifînden o havâlî bi'l-külliyye tasfiye olunmuşidi. Eşkıyây-ı mezbûre Plevne ve Berkofça ve Niğbolu'ya Vidin Muhâfızı'nın icâzet ü delâletiyle duhûl ve giderek her tarafa vukūʿ-ı mazarratları ihtimâli tahdîş-i kulûb-ı erbâb-ı ʿukūl edüp, binâ-berîn Mûsâ Paşa, Niğbolu zabtına ve Mehmed Paşa, Plevne cânibine taʿyîn olunmuşidi. Vezîr Mûsâ Paşa şehr-i Rebîʿulâhır'ın yirminci günü me'mûr-ı maʿiyyeti olan asâkir ile Ziştovi'den hareket ve şehr-i merkūmun yirmi dördüncü [Ü4 20b] günü ʿale's-seher Niğbolu üzerine hücûm ile tedmîr-i eşkıyâya mübâderet ve bir-iki sâʿatden sonra varoş zabt olunup, fi'l-hâl Tirsinikli-zâde Kapucu-başı İsmâʿîl Ağa kulle zabtına irsâl olunmağla, ber-vech-i sühûlet ü âsânî o dahi dâhil-i kabza-i asker-i Cihân-bânî olup, varoşdan firâr eden eşkıyâ kalʿaya tehassun ve zuhûr-ı imdâd fikriyle izhâr-ı sebât ü temekkün [Ü3 95b] ve mütâlaʿaları üzere Plevne tarafından imdâdları tebeyyün edüp, Tuna tarafından kalʿaya duhûl kasdında oldukları teʿayyün eyledikde, asâkir-i devlet bî-muhâbâ üzerlerine hücûm edüp, bir mikdârı kalʿaya firâr ve bir mikdârı kantara-i seyfden güzâr ve otuz mikdârı hayyen teslîm-i nefs-i bed-kirdâr edüp, müteʿayyinlerinden yirmi kadar ru'ûs-i ru'esâ, Âsitâne'ye resâ olup, meydân-ı siyâsete ilkā olunmuşidi. Muhâsaranın sekizinci günü -ki Cumâdelûlâ gurresi idi- ahşâmdan bir sâʿat mukaddem kalʿaya yürüyüş tarîkıyla hücûm gösterilüp, beş sâʿat kadar muhârebeden sonra eşkıyây-ı li'âm, mütezelzilü'l-akdâm ve birer fürce bularak rehgîrây-ı vâdî-yi inhizâm olmalarıyla, kalʿa mazbût-ı asker-i Pâdişâhî ve gürûh-ı muhâlifînin ekseri matmûre-nişîn-i demâr u tebâhî olduğu peyâmı vârid-i südde-i ʿadâlet-penâhî oldu.