Bin iki yüz on altı senesi Muharrem'inden zabt etmek üzere Kuds-i şerîf Kazâsı, ʿAbdullah Monla-zâde es-Seyyid Ahmed Efendi'ye ihsân ve bu sebeble mâ-beyne'l-müderrisîn silsile vâkiʿ olup, tertîbleri üzere her biri mazhar-ı birr ü imtinân kılınup, Mekke-i [Ü4 19b] mükerreme'den [Ü3 94b] istîfây-ı vakt-i hükûmet ile ʿavdet eden Emîn Kethudâ İmâmı Abdülkerîm Efendi, Şâm-ı şerîf'de fevt ve Mısır vakʿasında Kadı bulunup, baʿdehû Ordu Kadısı nasb olunan Başmakçı-zâde İbrahim Edhem Efendi dahi şerbet-çeş-i "Küllü nefsin zâyikatü'l-mevt olup, sâbıkā Burusa Kadısı ve Mekke Pâyesi olan Kebîrî-zâde es-Seyyid İsmâʿîl Efendi bir müddetden berü dil-rîş-i maraz-ı hâyil ve ol dahi bu esnâda dâr-ı âhırete mürtehil olup, müteveffâ Ordu Kadısı'nın mahalli hâlî ve Köstendilî Tâhir Efendi istemediği hâlde nasb-ı ahad-i mevâlî, nigâşte-i kalem-i Sadr-ı ʿâlî olmuşidi. Efendi-yi mûmâ ileyhe teklîf olundukda, İstanbul Pâyesi iʿtâ olunduğu hâlde ʿazîmet edeceğini ifade ve Mekke Pâyesi birkaç mâh mukaddem tarafına ihsân olunduğundan, taraf-ı Fetvâ-penâhî'den İstanbul Pâyesi hakkında istiksâr ve o aralıkda mevâlî-yi Devriyye'den sâbıkā Bağdâd Kadısı Nevşehirli Hasan Efendi metâlib-i ʿâdiyyesini bürûz-ı nefehât-ı mukadderât-ı Sübhâniyye'ye talʿîk ile hasbî ʿazîmete hâst-kâr olduğu tabʿ-ı hazret-i Şeyhülislâmî'ye hoş gelüp, fi'l-hâl telhîs ve mûcebince işbu Cumâdelûlâ gurresinden Ordu Kadılığı'na tahsîs olunup, muʿtâd olan Kastamoni arpalığını dahi Cumâdelâhire gurresinden tasarruf etmek kaydı, yedine verilan emr-i ʿâlîde tansîs olundu.