Kapudân-ı deryâ Vezîr Hüseyin Paşa hazretleri üç mâh kadar İskenderiyye etrâfında Donanma-yı hümâyûn ile deverân edüp, me'kûlât ve meşrûbâtlarına [Ü4 18b] nefâd geldiğine binâ'en, sefînelere teşhîn-i mâ ve zâd içün Finike Lîmânı'na ʿavdet ve İnce Mehmed Bey'in râkib olduğu “Bâd-ı Nusrat” nâm sefîne ile iki kıtʿa korvet sefînelerini ahvâl-i aʿdâya ıttılâʿ içün o havâlîde tevkīf ile lâzime-i ihtiyâta riʿâyet etmişidi. Mahall-i mezkûrdan müfârakatının üçüncü günü -ki şehr-i Rebîʿulevvel'in yirmi birinci Salı günü idi- hübûb-ı rîh-i şedîd ile kaʿr-ı deryâ gaylân ve sademât-ı efvâc-ı emvâc iʿâde-i rûz-i hevlnâk-ı tûfân edüp, sâlifü'z-zikr İnce Bey'in râkib olduğu sefînenin mâyistra ve tirinkete sütûnları şikest olup, seyr ü hareketden ʿâtıl ve gice sâʿat ikide Ebuhûr sığlarına düşüp, idâre vü tahlîsi müşkil olduğunu düşmen müşâhede ve ʿale't-teʿâkub toplar atmağla sefînenin ekser yerini küşâde eylediğinden gayri, cerîmlere rukûb ve sefîne üzerine vüsûb niyyetinde oldukları sefînede mevcûd askere münʿakis oldukda, mukābele ve birkaç sâʿat mukāteleden sonra askerin bir mikdârı şehîd ve bâkīsinde zaʿf u fütûr bedîd olup, o esnâda zikr olunan korvetler yetişüp, bir mikdâr âdem tahlîs etdikden sonra, sefîneyi ihrâk ve İnce Bey ve ru'esây-ı sefîneden bir mikdâr âdem düşmen tarafından istirkāk olunduğu ve mukaddemâ Fransızlar'ın üserâ mübâdelesi hakkında tahrîrâtları vârid olduğuna binâ'en, kayd-ı esre giriftâr olanlar ile maslahat-ı mübâdeleye müsâʿade olunacağı Vezîr-i müşârun ileyh tarafından Fransız Sergerdesi'ne tahrîr olunduğu haber-i hüzn-âveri işbu Rebîʿulâhır evâsıtında vâsıl-ı [Ü3 94a] Der-i devlet ve mübâdele husûsu dahi istimzâc olunup, rızây-ı tarafeyne muvâfik gelmediğinden, mevkūf-ı vakt-i meşiyyet kılındı. Korvetler imdâdıyla [Ü4 19a] İnce Bey'in tahlîs-ı nefs etmesi mümkin iken sûret-i isâr ihtiyâr eylemesi havf-ı mücâzât-ı vehmiyyeden neş'et eylediği bedîdârdır. Donanma-yı hümâyûn kapudanlarının râkib oldukları sefâyinin birinde kazâ vü kader muktezâsıyla bir hâdise-i semâviyye zuhûr edüp, kavlen ve fiʿlen indifâʿı kapudanın hîta-i kudret ve istitâʿatinden hâric olduğu ber-vech-i tahkīk Kapudan Paşa hazretlerinin maʿlûmu oldukda, o makūle emr-i hâyili ahkâm-ı kadere nisbetle reh-yâb olan kapudânını muʿâhazeden dâmen-çîn olup, izhâr-ı infiʿâl ve çîn-i cebîn eylemedikleri me'sûr-ı mezkûrun nezdinde vâsıl-ı derece-i ʿilmü'l-yakīn iken, imkân-ı semt-i necât ile ihtiyâr-ı mezellet-i isâr eylemesi mahall-i teʿaccüb-i uli'l-ebsârdır. Kapudân-ı mezkûr hadd-i zâtında şecîʿ ü behâdır ve iʿmâl-i levendâta kādir bir kimse olup, ancak kibr ü nahvetle maʿrûf ve daʿvây-ı "Ene lâ-gayr" sıfatı ile mevsûf olup, hâdisât-ı rûzgârdan gāfil ve hilye-i tecribe-i umûrdan ʿâtıl olmağla, bundan sonra kayd-ı esrden tahlîs-ı nefs ve eyyâm-ı zindegânîden bir müddet tahsîl-i yevm ü ems eyler ise, eyyâm-ı kürbet ve âlâm-ı gurbet ahlâkını tehzîb ve nefs-i ebiyyesini tezlîl ve ʿakl-ı tecâribi mesleğine delâlet ile aʿrâz-ı zâtiyyeden olan zemâyim-i etvârını mahv eyleyeceği vâreste-i ityân-ı delîldir.