Bir müddetden berü Segbân-başı olan Mustafa Ağa işbu Rebîʿulâhır'ın on sekizinci İsneyn günü iktizây-ı vakt ü hâl ile mansıbından infisâl ve Edirne kurbünde vâkiʿ çiftliğinde ikāmet içün şedd-i rihâl edüp, Âsitâne'de bi'l-fiʿl Kul Kethudâsı olan Bozacı-zâde Mehmed Ağa, Segbân-başı nasb olunup, münhall olan Kul Kethudâlığı, kureybü'l-ʿahdde Zağarcı-başı nasb olunan Kāsım Ağa'ya ve Âsitâne'de vekâleti sâbıkā Zağarcı olup, el-yevm Ruscuk'da mütemekkin Mektûbî-yi Sadr-ı aʿzâmî Recâ'î Efendi'nin kayın-atası Mehmed Ağa'ya Zağarcı-başılık tefvîz olunup, Ruscuğ'a Ocak mektûbu firistâde ve Humbaracı-başı İbiş Ağa ve Nâzırı Yaʿkūb Efendi dahi riʿâyet-i şurûta tekayyüd edemediklerinden, Humbaracı-başılık, Ohrili İsmâʿîl Bey'e ve Nezâreti, Matbah Emîni İsmâʿîl Efendi'ye irâde olunup, yevm-i mezkûrda bunlar dahi telebbüs-i hilʿât ile vâye-dâr-ı ʿizz ü rifʿat [Ü3 93b] oldular.