Muʿallem askerde olan nefʿ ü fâyide bi't-tecribe maʿlûm ve bu cihetle tevfîri beyyinü'l-lüzûm olduğuna binâ'en, Üsküdar bostancılarının âzmâyiş-i ceng ü harb ve teʿallüm-i fenn-i remy ü darb ile Levend Çiftliği askerine ilhâkları ve bir mahall-i muʿayyen tahsîsi ile levâzım u mühimmâtlarının nizâmı bi'l-ittifâk karâr-gîr-i erbâb-ı re'y ü tedbîr olmağla, Üsküdar'da Kavak Serâyı cenbinde olan fezây-ı vâsiʿ hâlî ve taʿlîm mahalline ihtisâs ile serây-ı mezkûrun hâriciyyesinde [Ü1 6b] kışlalar binâsı muvâfık-ı re'y-i ʿâlî olup, binâ-berîn işbu Rebîʿulevvel evâyilinde ʿiffetlü Şâh Sultân Kethudâsı ʿAzîz Efendi hâssaten Binâ Emîni taʿyîn ve Üsküdâr Ustası, Bin-başı nasb olunup, sâyir zâbitân ve neferâta Levend Çiftliği tertîbine tatbîk ile vazʿ-ı kānûn u âyîn kılınup, Pâdişâh-ı zafer-karîn “Eʿiddû lehüm me'stetaʿtüm” nass-ı mübînine ittibâʿ ile bu bâbda dahi mazhar-ı tevfîk-ı Hayru'n-nâsırîn oldular.