Erzurum Vâlîsi Vezîr Battâl [Ü4 6a] Hüseyin Paşa bundan akdem menşûr-ı Serʿaskerî ile cânib-i Mısır'a meʾmûr ve maʿiyyetinde ihtişâd edecek ru'esây-ı tavâyif-i askere ʿale'l-infirâd evâmir-i ʿaliyye şeref-sudûr olmuşidi. Müşârun ileyhin semen-i vücûdu mâniʿ-i hareket ü seyr ve hatb-ı cesîm-i meʾmûriyyeti muhtâc-ı idâre-i gayr olduğuna binâʾen, necl-i necîbi Tayyâr Mahmûd Bey'in Başbûğluk ile Mısır'a me'mûriyyetini tasvîb ve beyne'l-asâkir nüfûzuna sebeb olmak içün Rütbe-i Vezâret'le çırâğ buyurulması mukaddimâtını tertîb edüp, ʿözrü makbûl ve tedbîri muvâfık-ı usûl-i erbâb-ı ʿukūl olduğundan fazla, mahdûmunun i'mâl-i asker ve tertîb-i leşker husûslarında kudreti zâhir ve hengâm-ı peykârda kemâl-i cür'et ü metâneti, mücerreb-i ekâbir ü esâgır olduğuna binâ'en, şehr-i mezkûr evâyilinde Trabzon Eyâleti inzımâmıyla mîr-i mûmâ ileyhe câh-ı vâlâ-yı Vezâret ihsân ve Başbûğluk ile maʿiyyetine me'mûr asâkir-i mansûreyi alup, Mısır'a revân [Ü3 82a] olması emr ü fermân olunup, pederi müşârun ileyh dahi kemâ-kân merkezinde kıyâm ve verâdan pey-der-pey asker tesyîrine ihtimâm ve iktizâ ederse bi'n-nefs hareket etmek irâde-i seniyyesi tarafına işʿâr u ifhâm olundu.