Françelü ile Nemçelü mukaddemâ Venedik memleketini taksîm eylediklerinde, Nemçelü yedine geçen Venedik sevâhilinde sefîneleri Nemçe bayrağıyla geşt ü güzâr eder iken, Garb Ocağları tarafından zabt olunduğu Nemçelü cânibinden inhâ ve ber-mûceb-i ʿahid-nâme istirdâd olunması istidʿâ olunmuşidi. Sefâyin ve eşyâ ve ahmâl ve üserânın reddiyle defʿ-i nizâʿ olunması bâbında mukaddemâ [Ü3 81a] hatt-ı hümâyûn ile müveşşah emr-i Cihân-mutâʿ ısdâr olunup, Kapudan Paşa hazretleri maʿrifetiyle irsâl ve yüz doksan esîr teslîmi ile emr-i şerîfe imtisâl eylediler ise dahi, Venediklü zemânında cârî olduğu gibi iʿtibâren li'l-asl Nemçelü'den dahi ʿavâyid talebinde olduklarını işʿâr ve ol bâbda ʿarz u mahzar tesyâr etmişler idi. Venediklü'den Nemçelü'nün istihlâs eyledikleri sevâhil el-hâletü hâzihî Nemçelü'nün memâlik-i asliyyelerine mümâsil olup, ʿale'l-ıtlâk sefînelerine taʿarruz vukūʿunda redd ü tazmîn şıklarının icrâsı ʿahid-nâmelerinde tasrîh u tebyîn olunmuş olmağla, Devlet-i ʿaliyye'nin bu gāyile-i hâyilesi hılâlinde Nemçelü'nün taʿcîz ü tasdîʿi derkâr ve istirdâd mâddesinde ısrâr eyleyecekleri bedîdâr olup, binâʾen-ʿalâ-zâlik mukaddemâ ahz olunan sefâyin ve eşyaları takdîm eyledikleri defter mûcebince redd ve fîmâ-baʿd o makūle sefâyin sâyir müste'men tâyifesi sefâyininden ʿadd olunup, seyr ü hareketlerinde taʿarruzdan masûn ve ahz u gāretden me'mûn olmalariyçün Cezâyir-i Garb [Ü1 5b] Ocağları beylerbeylerine bâlâları hatt-ı hümâyûn ile müveşşah evâmir-i ʿaliyye ısdâr olunup, hâcegân-ı Dîvân-ı hümâyûn'dan muvakkaten Masraf Kitâbeti tevcîh olunan ʿAbdünnâfiʿ Efendi mübâşereti ile irsâl ve Nemçelü'ye ifâde-i sûret-i hâl kılındı.