Bi'l-fiʿl Şıkk-ı Evvel Defterdârı olup, berârî-yi Mısrıyye'de mübtelâ olduğu ʿillet, pezîrây-ı sıhhat oldukdan sonra, Ordu-yı hümâyûn'a ʿavdet etmek şartıyla bi'l-istîzân vâsıl-ı Âsitâne-i râstân olan Çelebi Reşîd Mustafa Efendi'de olan inhirâf-ı mizâc şifâ-yâb-ı ʿilâc olup, sefînesini techîz ve umûrunu tanzîm [Ü4 4b] ve bir gün sonra Ordu-yı hümâyûn'a hareketini tasmîm etmişidi. Re'îsülküttâb-ı Rikâb olan Cânib Sâlih Efendi'nin Defterdarlık gibi bu hıdmete dahi muvaffak olamadığı sebebi ile ʿazli cây-gîr-i zamîr ve Sadrıaʿzam hazretleri tarafına dahi kazıyye tahrîr olunup, Çelebi Efendi'nin ʿavdeti ʿan-asl tahliye mâddesine mebnî olup, sûret-i mezkûre ise bu esnâda kesb-i suʿûbet edüp, ʿazîmetinde çendân fâyide melhûz olmadığı bî-şübhe vü gümân vârid ve Defterdarlığı bi'n-nisbe sehl ü âsân [Ü3 80b] ve kime tefvîz olunur ise idâre edeceği nümâyân olduğuna binâʾen, mûmâ ileyhin Rikâb Riyâseti hıdmetiyle Âsitâne'de kalması istihsân olunup, işbu Rebîʿulevvel'in ikinci Pençşenbih günü bi'l-fiʿl Defterdarlık, sâbıkā Defterdâr Mektûbçusu ve el-yevm ʿArabacılar Kâtibi olan Saʿdullah Efendi'ye ve Riyâset, minvâl-i muharrer üzere Çelebi Efendi'ye tevcîh olundu. Efendi-i mûmâ ileyh kudemây-ı ricâl-i Devlet-i ʿaliyye'den ve fikret-i sahîha ve cevdet-i karîha erbâbından olup, tekādüm-i ʿahd ile aʿyün-i nâsda kadr ü mehâbeti ve ahvâl-i düvelde mümâreseti olmağla, câme-i zer-beft-i Riyâset kāmet-i istihkākına sezâ ve tevellâ-yı serâyir-i devlet zât-ı bî-hemtâsına revâ olup, “Kad vasale'l-hakku ilâ ehlihî” makāliyle herkes gûyâ ve kabûl-i ʿâmme sûreti mirʾât-ı hâlinde hüveydâ oldu. Re'îsülküttâb-ı sâbık iki cesîm mansıbda tevkîf-i hakka makrûn olmayup, ʿazl-i ʿâcil ile masrafı gâyete vâsıl ve ʿale'l-husûs nân-pâresi olan Tersâne Cânibliği'ne âhar nâyil olduğundan, sıfru'l-yed ve hâliyyü'l-cerâb kalmağla, hakkında deryây-ı merhamet-i Mülûkâne mütemevvic ve yevm-i mezkûrda Hubûbât Nezâreti tevcîhiyle münbasit [Ü4 5a] ü mübtehic olup, münhall olan ʿArabacılar Kitâbeti ile sâbıkā Mâliyye Tezkirecisi Seyyid Sâdık Efendi memnûn ve muvâzıb-ı duʿây-ı Şehriyâr-ı rubʿ-meskûn oldu.