Müşârun ileyh yirmi üç mâh kadar Şeyhulislâm ve Müfti'l-enâm olup, etrafında bulunan nakd-gîrân-ı enâm müşârun ileyhi mevzûʿ-ı bahs-i hâss u ʿâmm ve üftâde-i çâr-tâk-ı teveccüh-i Husrev-i Dârâ-gulâm eylediklerine binâ'en, işbu Saferü'l-hayrın on sekizinci Pençşenbih günü mesned-i Fetvâ'dan tenzîl olunup, sâbıkā Rumeli Kadıʿaskeri ʿÖmer Hulûsî Efendi hazretleri nezâhet ü ʿiffet ve kemâl-i ʿilm ü fazîlet ile bâliğ-i nisâb-ı hüsn-i şöhret olduğundan fazla, rûz u şeb tâʿat-ı Hâlık-ı bî-enbâzı nükāve-i şugl ü ʿamel ve müzahrafât-ı kevniyyeden katʿ-ı peyvend-i emel edüp, dâmen-i ʿismeti bertîl ü rişâdan pâk ve tûde-i zer ü sîm nazar-ı ʿibretinde kemter-ez-hâk olduğuna binâ'en, hakkında ân-be-ân hüsn-i zann-i Mülûkâne mukarrer ve der-heme sâʿat bâre-i [Ü4 4a] fâzılânesinde tulûʿ-1 tebâşîr-i ikbâl muntazır olmuşidi. Lâ-cerem yevm-i mezkûrda Beşiktaş Serâyı'na daʿvet ve huzûr-ı hümâyûnda hilʿat-i beyzây-ı Fetvâ ile memnûn-ı nevâziş ü rağbet kılınup, mekālîd-i umûr-ı ʿilmiyye müfevvaz-ı dest-i kifâyeti ve ezimme-i hatb-ı cesîm-i şerîʿat müsellem-i enâmil-i emâneti kılındı.