Muʿzamât-ı vekāyiʿ-i Devlet-i ebed-müddet'den olan Korfa'nın bu defʿa karâr-gîr olan sûret-i nizâmı ve havz-ı kebîrin bed' ü hıtâmı ve Mısr-ı Kāhire keyfiyyetinin encâmı, inşâ'allâhü Te'âlâ bundan sonra kalem-i nâdire-rakam ile nakş-pezîr-i harîr-i tahrîr ve sâl-i cedîd eczâsına idhâl-i rekîz-i zamîr olup, hemân cenâb-ı Müfîzü'l-cûdi ve'l-ihsân, cellet zâtuhû 'an-vasmeti'n-noksân şîrâze-i eczây-ı kâyinât ve ser-levha-i mecmû'a-i mevcûdât olan vücûd-ı 'âlem-sûd-ı Husrevâne'yi medde'l-eyyâmi ve's-sâ'ât çâr-bâliş-nişîn-i erîke-i meserrât edüp, pîrâmen-i çemenistân-ı Devlet-i ebed-hulûd'larında nâbit-i gayr-i sâbit olan giyâh-ı huşk-ı mazarrat-ı a'dâyı cemretü'l-gazây-ı kahr-ı Samedânî'siyle [Ü3 76b] sûzân ve i'lâ'-i Kelimetullah irâdesiyle berr ü bahrda mütehaşşid olan leşker-i zafer-rehberine Hızır-ı tefvîkı hem-'inân eyleye, âmîn!; intehâ el-cildü's-sânî min Târîhi Mehâsini'l-Âsâr ve Hakāyıkı'l-Ahbâr ve yelîhi el-cildü's-sâlis min evveli senete hamse 'aşerate ve mi'eteyn ve elf.